ევროპარლამენტარი რასა იუკნევიჩიენეს განცხადებით, ხელისუფლების უარი ევროკავშირის დახმარებაზე, პირდაპირ მეტყველებს, რომ მთავრობას არ სურს რეფორმების გატარება. მისი თქმით, მნიშვნელობა არ აქვს აიღებენ თუ არა ამ დახმარებას, მაინც უნდა გააგრძელონ რეფორმები, რადგან აღიდგინონ ნდობა.

"სამწუხაროდ, ბოლო დროს მმართველი პარტიისგან ძალიან ბევრი მესიჯი მოდის ევროკავშირთან დაკავშირებით. მათ შორის 19 აპრილის შეთანხმების ხელშეკრულებიდან გასვლა, ქუჩაში მომხდარი ძალადობა, ჟურნალისტებზე შეტევა, რომელსაც მთავრობის მხრიდან არ მოჰყოლია შესაბამისი რეაქცია, ევროკავშირის დროშის ჩამოგდება და დაწვა. ევროკავშირის დახმარებას ყოველთვის ახლდა პირობითობა, ხელისუფლების უარი ევროკავშირს, პირდაპირ მეტყველებს იმაზე რომ მთავრობაა არ სურს რეფორმების გატარება", — თქვა რასა იუკნევიჩიენემ მთავარი არხის ეთერში.

რასა იუკნევიჩიეს შეფასებით, "ხელისუფლების ეს გადაწყვეტილება არის საქართველოს ევროპული გზის წინააღმდეგ მიმართული". ევროპარლამენტარი განმარტავს, რომ დახმარება კეთდება საქართველოს მოქალაქეებისთვის და არა თავად ევროპისთვის, ევროკავშირის წევრი ქვეყნებისთვის.

"საქართველომ უნდა აღიდგინოს ნდობა საერთაშორისო ასპარეზზე, რომელიც ახლა დაზიანებული და დაკარგულია. მთავრობამ უნდა გაითვალისწინოს საზოგადოების ნება, რომელსაც ევროპული მომავალი უნდა. ქართველმა ხალხმა კი ნათლად უნდა თქვას, ეთანხმებიან თუ არა ისინი ხელისუფლების მხრიდან ევროპული გზის უარყოფას, ევროკავშირის წევრობაზე უარის თქმას. ამის გარკვევის გზა გამჭვირვალე არჩევნებია და იმედია ოქტომბერში ჩვენ ამას ვნახავთ", — აღნიშნა რასა იუკნევიჩიენემ. [მთავარი არხის თარგმანი]

ირაკლი ღარიბაშვილმა ევროკავშირის მაკროფინანსურ დახმარებაზე უარის თქმის შესახებ განცხადება გუშინ, 31 აგვისტოს გააკეთა. სწორედ ამას გამოეხმაურა რამდენიმე ევროპარლამენტარი. მაგალითად, ვიოლა ფონ კრამონის განცხადებით, საქართველოს მთავრობამ დაასწრო ევროკავშირს, რადგან ჰქონდა მოლოდინი, რომ პირობების არშესრულების გამო დახმარებას ვერ მიიღებდნენ. ანდრიუს კუბილიუსის თქმით კი, საქართველოს მთავრობის მხრიდან ევროკავშირის მაკროფინანსური დახმარების მეორე ნაწილის არაღება ნიშნავს, რომ ხელისუფლება არ არის მზად იმ პირობების შესასრულებლად, რომლებიც დახმარების მისაღებად არის საჭირო.

საქართველოს მთავრობის გადაწყვეტილებას გამოეხმაურა ევროკავშირიც. საქართველოში ევროკავშირის წარმომადგენლობის ხელმძღვანელის მოვალეობის დროებითი შემსრულებლის, ჟულიენ კრამპის განცხადებით, პატივს სცემენ ხელისუფლების გადაწყვეტილებას, არ მიიღოს ევროკავშირის მაკროფინანსური დახმარება, თუმცა აქვე აღნიშნავენ, რომ საქართველომ მისი მიღების პირობები ვერ შეასრულა. ევროკავშირის განცხადებით, საქართველოსთვის გასაცემი დახმარება დამოკიდებული იქნება ძირითადი რეფორმების განხორციელებისას მიღწეულ წინსვლაზე.

პრემიერმინისტრმა, ირაკკლი ღარიბაშვილმა დღეს ასევე თქვა, რომ ევროპარლამენტარი მისი უფროსი "არ არი". მის ამ განცხადებას ევროპარლამენტარი ვიოლა ფონ კრამონი გამოეხმაურა, მან სოციალურ ქსელში დაწერა, რომ ღარიბაშვილის უფროსობა "ძალიან მაცდური კარიერული პერსპექტივაა".

გაიგე მეტი:

• ამჯერად რა თქვა ღარიბაშვილმა
• რა არის ევროკავშირის მაკროფინანსური დახმარება