ცენტრალური საარჩევნო კომისიის ინფორმაციით, 2 ოქტომბერს დანიშნული თვითმმართველობის არჩევნებზე ხმის მისაცემად ამომრჩევლებს, რომელთაც აქვთ იურიდიული ძალის მქონე საქართველოს მოქალაქის პირადობის მოწმობა ან პასპორტი და მოხსნილი არიან საცხოვრებელი ადგილის მიხედვით რეგისტრაციიდან, ან მათი რეგისტრაცია ძალადაკარგულად არის გამოცხადებული, ამომრჩეველთა ერთიან სიაში შედის ბოლო რეგისტრაციის ადგილის ან ფაქტობრივი საცხოვრებელი ადგილის მიხედვით.

მათივე განმარტებით, მისამართის გარეშე რეგისტრირებული ამომრჩევლები ერთიან სიაში სახელმწიფო სერვისების განვითარების სააგენტოს მონაცემთა ელექტრონულ ბაზაში არსებული ფაქტობრივი საცხოვრებელი ადგილის მიხედვით შედიან.

ცესკოს განცხადებით, რეგისტრაციიდან მოხსნილმა, რეგისტრაცია ძალადაკარგულმა და მისამართის მითითების გარეშე რეგისტრირებულმა ამომრჩეველმა, რომელთა ფაქტობრივი საცხოვრებელი ადგილიც არ არის მითითებული სააგენტოს მონაცემთა ელექტრონულ ბაზაში, 11 სექტემბრის ჩათვლით უნდა მიმართონ სახელმწიფო სერვისების განვითარების სააგენტოს, მიუთითონ საცხოვრებელი ადგილი და ციფრულ ფორმატში გადაიღონ ფოტოსურათი.