ქართული ოცნების ორმა წევრმა პარტია დატოვა და ნაციონალურ მოძრაობას შეუერთდა. როგორც ენმ-ში On.ge-ს განუცხადეს, ესენი არიან ელგუჯა გურგენიძე და ოთარ პატიაშვილი.

მათივე თქმით, გურგენიძე, რომელიც აქამდე ამბროლაურის საკრებულოს თავმჯდომარის მოადგილე იყო, მუნიციპალიტეტის მერობისთვის ენმ-ის სახელით იბრძოლებს. მისი თქმით, ეს გადაწყვეტილება ქართული ოცნების ქმედებებმა და კურსის ცვლილებამ მიაღებინა.

"ძირითადი მიზეზია ქვეყნის მიმართ დამოკიდებულება. მე ვიცი, რომ იმ ჩემს პატარა ქალაქში, საცხოვრისში, სადაც მე ვარ, ამის გაგრძელება არ შეიძლება. ძალიან ცუდ შედეგებამდე მიგვიყვანს, ამიტომ მე მივიღე ეს გადაწყვეტილება", — განაცხადა ელგუჯა გურგენიძემ 24 აგვისტოს გამართულ ბრიფინგზე.

ოთარ პატიაშვილი კი ლანჩხუთის საკრებულოს წევრია, ქართული ოცნებიდან. საკრებულოს წევრობისთვის ის ისევ იბრძოლებს, მაგრამ ამჯერად უკვე ენმ-ის სახელით.

"ნაციონალური მოძრაობა არის ძალა პროგრესის, ევროპული ღირებულების და ქვეყნის წინსვლის გარანტი. დადგება 2 ოქტომბერი და თითოეული ქართველი, თითოეული ადამიანი წვლილს შეიტანს ამ გამარჯვებაში და ეს რიცხვი საქართველოს ისტორიაში ოქროს ფურცლად ჩაიწერება", — ამბობს მმართველი პარტიის ყოფილი წევრი, ოთარ პატიაშვილი.

გაიგეთ მეტი