საპარლამენტო უმცირესობის, მოძრაობა თავისუფლებისთვის - ევროპული საქართველოს წარმომადგენლები მიიჩნევენ, რომ ჯანდაცვის მინისტრმა დავით სერგეენკომ მოქალაქეების სოციალური დახმარება პოლიტიკური მიზნით გამოიყენა. პარტიის წევრი, ზურაბ ჭაიბერაშვილი ამბობენ, რომ წინასაარჩევნოდ ქართულმა ოცნებამ 40 ათასით გაზარდა საარსებო შემწეობის მიმღებთა რიცხვი, არჩევნების შემდეგ კი დაახლოებით ამდენივეთი შეამცირა.

“მეხუთე თვეა, მილიარდერი ივანიშვილის მთავრობა ათიათასობით სოციალურად დაუცველ ოჯახს ართმევს საარსებო შემწეობას იმ ფონზე, როდესაც ამავე მთავრობის არასწორი ეკონომიკური პოლიტიკით ხალხი უფრო და უფრო ღარიბდება,“ - აღნიშნა ზურაბ ჭიაბერაშვილმა.

ევროპული საქართველო მოითხოვს, შემწეობა აღუდგეს სოციალურად დაუცველ ყველა ოჯახს, რომელიც უსახსროდ დარჩა.

ჯანდაცვის სამინისტროს სოციალური მომსახურების სააგენტოში არასერიოზულს უწოდებენ ჭიაბერაშვილის მიერ მათ მიმართ გამოთქმულ ბრალდებებს. სააგენტოს პრესსამსახურში ამბობენ, რომ სააგენტოს არ აქვს ბერკეტი და მექანიზმი საარსებო შემწეობის მიმღებთა რაოდენობის ხელოვნურად გაზრდისა და შემცირების.

„საშუალოდ ყოველთვიურად, ბაზაში 5 000 ახალი ოჯახი შედის და დაახლოებით ამდენივე გადის. აღსანიშნავია, რომ მიმღებთა შორის გაიზარდა მრავალწევრიანი და ბავშვიანი ოჯახების რიცხვი... ბაზაში საარსებო შემწეობის მიმღებ პირთა რაოდენობის კლება ან ზრდა არ არის ამოვარდნილი იმ საერთო სურათიდან, რაც ზოგადად ახასიათებს ამ პროგრამას,“ - აღნიშნავენ სააგენტოს პრესსამსახურში.

მათივე განცხადებით, ყველა იმ პირმა, ვინც სოციალური დახმარების პროგრამით სარგებლობდა, ვერ მიიღო დაბალი სარეიტინგო ქულა, რის გამოც ამოვარდნენ პროგრამიდან.

ევროპული საქართველოს მიერ ჟურნალისტებისთვის წარდგენილი საარსებო შემწეობის მიმღებთა რაოდენობრივი მონაცემები.

ფოტო: ევროპული საქართველო