პანდემიის წინააღმდეგ ბრძოლაში რომ ვაქცინაცია მსოფლიოს მთავარი იარაღია, ამას საკუთარ გულშემატკივრებს უამრავი ვარსკვლავი ახსენებს. მათ შორისაა მსახიობი შონ პენიც, რომელიც ვაქცინაციის აუცილებლობაზე ხშირად საუბრობს.

შონ პენმა საკუთარი პოზიცია მკაფიოდ თავისი ახალი ფილმის Flag Day-ის პრემიერაზე დააფიქსირა, როდესაც დამსწრე საზოგადოებას პირბადის ტარება და ვაქცინაციის დამადასტურებელი დოკუმენტის წარმოდგენა მოსთხოვა.

"უნდა ვთქვა, რომ აუცრელი ადამიანები კინოში არ უნდა დადიოდნენ. დარჩით სახლში მანამ, სანამ ამ აშკარად უსაფრთხო ვაქცინების სანდოობაში არ დარწმუნდებით", —განაცხადა მსახიობმა.

ამჯერად, Flag Day-ის შესახებ CNN-თან მიცემულ ინტერვიუში მსახიობმა განაცხადა, რომ ვაქცინაცია სავალდებულო უნდა იყოს. მან ისიც აღნიშნა, რომ აშშ-ის მთელი ისტორია დამოუკიდებლობას იმიტომ ეფუძნება, რომ ამერიკელებს ერთმანეთზე დამოკიდებულების მნიშვნელობა ესმით.

"ჩემი აზრით, ეს [ვაქცინაცია] სავალდებულო უნდა იყოს, როგორც ღამით მანქანის შუქების ჩართვა", — ამბობს შონ პენი.

აღსანიშნავია, რომ შონ პენი ფილმ Gaslit-ის გადასაღებ მოედანზე დაბრუნებაზე მანამდე აცხადებდა უარს, სანამ ფილმის შექმნაში ჩართული ყველა ადამიანი არ აიცრა. მსახიობმა საკუთარი არასამთავრობო ორგანიზაციით პანდემიის პერიოდში მოსახლეობა უფასო კოვიდტესტებითაც მოამარაგა. შონ პენის თქმით, იმავეს გაკეთებას ჰაიტიშიც გეგმავს.