სახალხო დამცველი, ნინო ლომჯარია საქართველოს ხელისფლების კორონავირუსის მართვის პოლიტიკას აკრიტიკებს და ამბობს, რომ ეს წინასაარჩევნოდ მოქალაქეთა "გულების მოგებას" გულისხმობდა. მისი თქმით, მთავრობამ ვაქცინაციის კამპანიის აქტიურად წარმოებაზე ანტივაქსერთა მხარდაჭერის დაკარგვის შიშით თქვა უარი.

"არ არის სიმართლე, რომ ხელისუფლებას არ ჰქონია კოვიდის მართვის პოლიტიკა — მას ჰქონდა პოლიტიკა და ეს პოლიტიკა გულისხმობდა: საზოგადოების ჯანმრთელობის და მრავალი ადამიანის სიცოცხლის რისკის ხარჯზე ეკონომიკური ზრდის მიღწევას; კანონდამრღვევი მოქალაქეების წინასაარჩევნოდ გულის მოგებას პირბადეების ტარების ვალდებულების გაუქმებისა და ჯარიმების ჩამოწერის გზით; აცრების პოპულარიზაციის აქტიური კამპანიის წარმოებაზე უარის თქმას ანტივაქსერების მრავალრიცხოვანი ჯგუფის მხარდაჭერის დაკარგვის შიშით. ოპოზიციის პოლიტიკა იყო, ეთქვა ყველაფერი საწინააღმდეგო, რასაც ხელისუფლება გააკეთებდა", — წერს ის.

მისი თქმით, წესით დამოუკიდებელი ინსტიტუტი, რომელსაც საზოგადოებრივი ჯანდაცვა აბარია, პოლიტიკური ზეგავლენის ქვეშ მოექცა და ვერც წინააღმდეგობის გაწევის თავი აღმოაჩნდა.

"ასე იქნება ყველა სფეროში, სანამ უცოდინარი პოლიტიკოსები პირადი ინტერესებიდან გამომდინარე იმოქმედებენ და სანამ დამოუკიდებელი ინსტიტუტები იქნებიან მათთან თვალებში შემციცინე პოზაში", — წერს ლომჯარია საკუთარ Facebook-ზე.

21 აგვისტოს მონაცემებით, ბოლო 24 საათში საქართველოში კორონავირუსით 74 ადამიანი გარდაიცვალა. პანდემიის დაწყებიდან დღემდე ეს სიკვდილიანობის ყველაზე მაღალი მაჩვენებელია. ამასთან, დადასტურდა 4 901 ახალი შემთხვევა, ხოლო გამოჯანმრთელდა 2 586 პირი.

წაიკითხეთ NCDC-სა და WHO-ს რეკომენდაციები კორონავირუსის პრევენციაზე: