პრემიერმინისტრმა, ირაკლი ღარიბაშვილმა განაცხადა, რომ ნაციონალურ მოძრაობას "სულს ამოხდის" დანაშაულების შეხსენებით. მან ექსპრეზიდენტ მიხეილ სააკაშვილს "მჩაგვრელი მასხარა" უწოდა.

"უკვირთ, როცა ჩვენ მათ [ნაციონალურ მოძრაობას] ამ დანაშაულებებს ვახსენებთ. რა თქმა უნდა, ყოველთვის შევახსენებთ. ყოველთვის, ყოველ დღე, მათივე სიტყვებით რომ ვთქვათ, სულს ამოვხდით ამ შეხსენებებით. იმიტომ, რომ არასოდეს აღარ დაბრუნდება ის ბნელი დრო, როცა ასეთი მჩაგვრელი მასხარა მართავდა ქვეყანას სააკაშვილის სახით", — განაცხადა ირაკლი ღარიბაშვილმა.

ეს განცხადება პრემიერმინისტრმა ქედის მერობის კანდიდატის წარდგენისას გააკეთა. ღარიბაშვილმა 12-წუთიანი გამოსვლის პირველი 6 წუთი სააკაშვილსა და ენმ-ზე საუბარს დაუთმო.

"ეს ცოტა გართობისთვის, რა თქმა უნდა, ახლა რაც შეეხება საქმეს ... " — თქვა ღარიბაშვილმა "დანაშაულების შეხსენებისა" და მიხეილ სააკაშვილის შეურაცხმყოფელი ტერმინებით მოხსენიების შემდეგ და მხოლოდ ამის მერე დაიწყო ქედის მერობის კანდიდატის წარდგენა.

ფრაზა "სულს ამოგხდით" ყოფილ დეპუტატს, გივი თარგამაძეს ეკუთვნის:

"თქვე ნაძირალებო, მართლა. არ გაგივათ ეს რევანში. რუსული დროშები არ იფრიალებს რუსთაველზე. ჩვენ რუსთაველსაც დავიცავთ, ქალაქსაც დავიცავთ და მთელ ქვეყანას დავიცავთ. სულს ამოგხდით, სულს ამოგხდით მაგისთვის", — განაცხადა თარგამაძემ 2007 წელს.

მოგვიანებით მან განმარტა, რომ მიმართავდა ადამიანებს, "რომლებიც სეჩინსა და ფსბ-ს ექვს გენერალთან ერთად ქართული სახელმწიფოებრიობის წინააღმდეგ სრულმასშტაბიან შეტევას აწარმოებდნენ".