20-წლიანი ომის დასრულებისა და ავღანეთზე კონტროლის ხელში აღების შემდეგ თალიბანმა მედიასთან პირველი პრესკონფერენცია გამართა, სადაც თალიბანის პრესსპიკერმა, ზაბიჰულაჰ მუჯაჰიდმა ქალთა უფლებებზე ისაუბრა. მან ამ საკითხს "ძალიან მნიშვნელოვანი" უწოდა და თქვა, რომ მხარს უჭერენ ქალთა უფლებებს, თუმცა მხოლოდ შარიათის კანონის ფარგლებში.

"ისლამური საამირო შარიათის კანონის ფარგლებში მხარს უჭერს ქალთა უფლებებს. ჩვენს დებს აქვთ იგივე უფლებები, ისინი შეძლებენ, რომ ისარგებლონ ამ უფლებებით. შეეძლებათ დაკავდნენ აქტივობებით სხვადასხვა სექტორში, სფეროში ჩვენი წესებისა და რეგულაციების საფუძველზე. ისინი ჩვენთან ერთად, მხარდამხარ იმუშავებენ და თუ საერთაშორისო საზოგადოება წუხს, ჩვენ გვსურს ისინი დავარწმუნოთ, რომ ქალების მიმართ არ იქნება რაიმე სახის დისკრიმინაცია, მაგრამ რა თქმა უნდა, ჩვენი წესების ფარგლებში", — თქვა პრესსპიკერმა.

საგულისხმოა, რომ 1996-2001 წლებში, როდესაც ავღანეთი შარიათის კანონის შესაბამისად იმართებოდა, ქალებს უწევდათ, რომ ეტარებინათ ბურკა, რომელიც მათ მთელს სხეულს ფარავდა. ასევე, შარიათის კანონი უკრძალავდა 10 წელზე უფროს გოგოებს, რომ სკოლაში ევლოთ.

თალიბანის პრესსპიკერმა პრესკონფერენციაზე, ასევე, განაცხადა, რომ ისინი შურისძიებას არ აპირებენ.

"მსურს, დავარწმუნო თანამემამულეები, არ აქვს მნიშვნელობა ისინი თარჯიმნები იყვნენ, იყვნენ თუ არა სამხედრო საქმიანობაში ჩართული, თუ იყვნენ მოქალაქეები, მათ ყველას ვპატიობთ. შურს არავისზე ვიძიებთ. ახალგაზრდები, რომელთაც აქვთ ნიჭი, ვინც აქ გაიზარდნენ, ჩვენ არ გვინდა, რომ ისინი წავიდნენ", — განაცხადა მან.

რაც შეეხება მედიის საქმიანობას, ზაბიჰულაჰ მუჯაჰიდის განცხადებით, თალიბანი თავისუფალი და დამოუკიდებელი მედიის მხარდამჭერია, თუმცა ამ მხრივ არაფერი უნდა იყოს ისლამური ღირებულებების საწინააღმდეგო.

"როდესაც საქმე ეხება მედიის საქმიანობას, არაფერი უნდა იყოს ისლამური ღირებულებების საწინააღმდეგო, ამიტომ აქ ისლამური ღირებულებები უნდა იყოს გათვალისწინებული. მედია არ უნდა მუშაობდეს ეროვნული ღირებულებების, ეროვნული ერთიანობის წინააღმდეგ", — ამბობს დაჯგუფების პრესსპიკერი.

გაიგე მეტი: