2020-2021 წლების ყველაზე ნეგატიური ფრაზა, მართლაც "თქვენ კოვიდ-დადებითი ხართ" არის, თუმცა ნუ იღელვებთ, პანდემიის მიმდინარეობისას კორონავირუსული ინფექციის მართვის შესახებ ბევრი ინფორმაცია დაგროვდა და თქვენც გიზიარებთ.

რჩევა #1

შეინარჩუნეთ სიმშვიდე. რაც უნდა წარმოუდგენლად ჟღერდეს, კორონავირუსი აზიანებს ნერვულ სისტემას, ამიტომ სიმშვიდის შენარჩუნება საკმაოდ რთული, მაგრამ აუცილებელია იმისთვის, რომ სიმპტომები ხელოვნურად არ დამძიმდეს (სუნთქვის გაძნელება, შფოთვა, უძილობა).

რჩევა #2

დროულად დაუკავშირდით ჯანდაცვის ცხელ ხაზს და დადექით აღრიცხვაზე. თქვენზე მომაგრებული კოვიდ-თერაპევტი დისტანციურად მეთვალყურეობს ინფექციის მიმდინარეობას.

რჩევა #3

დადასტურებიდან მე-5-6-ე დღეს პირადი ექიმის რეკომენდაციით, ჩაიტარეთ შემდეგი კვლევები:

კოაგულოგრამა — ზოგადად, ინიშნება სისხლის შემადედებელი სისტემის შეფასების მიზნით.

D-დიმერი — თრომბოზის გამოსარიცხად ინიშნება. D-დიმერის ტესტის უარყოფითი შედეგი გამორიცხავს ფილტვების მწვავე ემბოლიასა (PE) და ღრმა ვენების თრომბოზს (DVT). დადებითი პასუხი კი საჭიროებს დამატებით ინსტურმენტულ კვლვებს თრომბოზის დადასტურების მიზნით.

C რეაქტიული ცილა — ინფექციური და ანთებითი დაავადებების დიაგნოსტირებისთვის და შესაბამისი მკურნალობის ადეკვატურობის მონიტორინგისთვის. მომატებული მაჩვენებელი ანთებითი პროცესის ნიშანია.

კვლევის შედეგებზე დაყრდნობით ექიმის განსაზღვრავს მკურნალობის ტაქტიკას.

რჩევა #4

დააკვირდით სიმპტომატიკას. მაშინ, როდესაც მკურნალობას თერაპევტი თქვენ მიერ მიწოდებულ ინფორმაციაზე დაყრდნობით გეგმავს, აუცილებელია იცოდეთ შემდეგი მაჩვენებლები: პულსი, წნევა, სხეულის ტემპერატურა. პაციენტებისთვის, რომლებსაც სუნთქვის გაძნელება აქვთ, სასურველია, წუთში სუნთქვის რიტმის დათვლა.

რჩევა #5

მიიღეთ ბევრი სითხე. თუ დიარეა, ოფლიანობა, სხეულის მაღალი ტემპერატურა გაწუხებთ, თქვენი ორგანიზმი დიდი რაოდენობით სითხეს კარგავს, ამიტომ განსაკუთრებით აუცილებელია წყლის ბალანსის აღდგენა და საკმარისი რაოდენობის სითხის მიღება.

რჩევა #6

გააკეთეთ სუნთქვითი ვარჯიშები, ის წმენდს ფილტვებს და აუმჯობესებს ჟანგბადის მიმოცვლას. ფილტვის ქვედა ნაწილის გაფართოება იქ არსებულ ლორწოს გამოდევნის.
სუნთქვითი ვარჯიშები შესაძლოა იყოს:

• ღრმა ჩასუნთქვა ცხვირით, ხუთი წამით სუნთქვის შეკავება და პირით ამოსუნთქვა. შემდგომ პირით ჩასუნთქვა და ცხვირით ნახშირორჟანგის გამოდევნა. შეასრულეთ ვარჯიში აუღელვებლად, მხოლოდ 5 ჯერ.

• ბუშტის გაბერვა — წინააღმდეგობის დაძლევა სუნთქვით, აფართოებს გულ-მკერდს და ხსნის მის შესაძლო სიმჭიდროვეს.

რჩევა #7

იმოძრავეთ, აუცილებლად იმოძრავეთ. შეუწყვეთ ხელი თქვენს ფიზიკურ აქტივობას, იცეკვეთ, იარეთ, გააკეთეთ ნელი ჩაჯდომები. როდესაც ახლობლები მოსაკითხად დაგირეკავენ, ეცადეთ, საუბრისას იაროთ.

ნუ გადაიტვირთავთ თავს, რათა თავბრუსხვევა ან სისუსტე არ განგივითარდეთ.

რჩევა #8

მაღალი ტემპერატურის (38C და ზემოთ) შემთხვევაში, მიიღეთ იბუპროფენი ან პარაცეტამოლი. თუ აღნიშნული სიმპტომი მედიკამენტს არ დაექვემდებარა, შეატყობინეთ თერაპევტს.

რჩევა #9

დაიცავით იზოლაციის წესები. გაითვალისწინეთ, პროტოკოლით დადგენილი იზოლაციის პერიოდი, დადებითი პასუხის დაფიქსირებიდან, 14 დღეა.
ნუ შეუქმნით გარშემომყოფებს საფრთხეს.

რჩევა #10

გილოცავთ, 14 დღის გასვლის შემდგომ თქვენი ორგანიზმი სრულად დატოვა კოვიდ-19-მა. სულერთია რას აჩვენებს ტესტი. რეალურად სიმპტომების ნაწილის ან კოვიდ-დადებითობის მაჩვენებელი შეიძლება რამდენიმე თვეს გაგრძელდეს. იზრუნეთ საკუთარ თავზე, სხვების უსაფრთხოებაზე, განაგრძეთ ცხოვრება ჩვეულ რიტმში და დაიცავით გავრცელებული რეგულაციები.

თუ კოვიდ-19-ის სიმპტომები გაქვთ, ბინაზე გამოიძახეთ ლაბორატორია და ჩაიტარეთ ტესტირება სწრაფი ან PCR მეთოდით.