პარტია მოქალაქეების ლიდერი, ალეკო ელისაშვილი მძიმე ეპიდემიოლოგიური ვითარების ფონზე პრემიერმინისტრის მიერ ქეიფში მონაწილეობას უპასუხისმგებლობას უწოდებს და ამბობს, რომ "რა თქმა უნდა, ყველა ბედნიერი" იქნებოდა ლაშა ბექაურთან ერთად ქეიფით, მაგრამ ეს უპასუხისმგებლობაა.

"ვხედავთ უპასუხისმგებლობას მაღალი თანამდებობის ადამიანების. შეიძლება, პრემიერმინისტრი ისე უპასუხისმგებლოდ იქცეოდეს, როგორც მოიქცა? შეიძლება, ისე უპასუხისმგებლოდ მოქცევისა და ქეიფში ყოფნის შემდეგ გვიხსნიდეს, რომ რა მოხდა ახლა, ქეიფში არ წახვიდოდით? რა თქმა უნდა, ყველა ბედნიერი ვიქნებოდით ლაშა ბექაურთან ერთად რომ ვქეიფობდეთ, მაგრამ ასეთი უპასუხისმგებლო ქცევები იწვევს ასეთ შედეგებს, რომელიც გვაქვს", — თქვა ელისაშვილმა TV პირველის ეთერში.

რთული ეპიდემიოლოგიური ვითარების ფონზე, 7 აგვისტოს ქვეყნის პრემიერმინისტრმა, ირაკლი ღარიბაშვილმა ხალხმრავალ სუფრაზე იქეიფა. სოციალურ ქსელში გავრცელებულ ვიდეოებში ჩანს, რომ სივრცეში არ იყო დაცული სოციალური დისტანცია, შეკრებილები იყვნენ პირბადის გარეშე და ირღვეოდა სხვა რეკომენდაციებიც. ვიდეო სავარაუდოდ კახეთში, სოფელ არხილოსკალოშია გადაღებული, სადაც ღარიბაშვილი ოლიმპიური ჩემპიონის, ლაშა ბექაურის დახვედრის ცერემონიას დაესწრო.

ქვეყანაში ეპიდემიოლოგიური მდგომარეობა სულ უფრო და უფრო მძიმდება. ინფიცირების ყოველდღიური მაჩვენებელი ბოლო პერიოდში 5 ათასს აჭარბებს. ამ ეტაპზე საქართველოში კორონავირუსის მეოთხე ტალღაა და სწორედ დღეს, ჯანდაცვის მინისტრის მოადგილემ, თამარ გაბუნიამ განაცხადა, რომ პიკის დაღმასვლა ჯერ არ შეინიშნება. ამ ფონზე საკოორდინაციო საბჭო, რომელსაც თავად პრემიერმინისტრი, ირაკლი ღარიბაშვილი ხელმძღვანელობს, მუდმივად მოუწოდებს მოსახლეობას რეკომენდაციების დაცვისკენ, რაც სოციალურ დისტანციას და ხალხმრავალი შეკრებებისგან თავის არიდებას გულისხმობს. უფრო მეტიც, დაავადებათა კონტროლისა და საზოგადოებრივი ჯანმრთელობის ეროვნული ცენტრის დირექტორმა, ამირან გამყრელიძემ განაცხადა, რომ განიხილება დიდი თავშეყრების აკრძალვაც.

აღსანიშნავია ისიც, რომ მაშინ, როცა პრემიერმინისტმა არაერთხელ მოუწოდა მოსახლეობას ვაქცინაციის პროცესში ჩართვისკენ, ის მხოლოდ გუშინ, 8 აგვისტოს, ხალხმრავალ ქეიფში მონაწილეობის შემდეგ აიცრა.

გაიგე მეტი: