ტურიზმის ეროვნული ადმინისტრაციის ინფორმაციით, ივლისში საქართველოში 230 902 უცხოური ვიზიტი განხორციელდა, რაც პანდემიის პერიოდისთვის ყველაზე მაღალი მაჩვენებელია. უნდა აღინიშნოს, რომ ივლისის თვეში განხორციელებული ვიზიტების რაოდენობა, გასული წლის იმავე პერიოდთან შედარებით, 403,7%-ით არის გაზრდილი, თუმცა 2019 წლის იმავე თვის მონაცემს 73,8%-ით ჩამორჩება.

ასეთია იმ ქვეყნების ჩამონათვალი, რომელთა მოქალაქეებმაც ივლისში ყველაზე მეტი უცხოური ვიზიტი განახორციელეს:

  1. თურქეთი — 35 ათასი ვიზიტი; ზრდა გასული წლის იმავე თვესთან — 91,3%;
  2. რუსეთი — 25,1 ათასი ვიზიტი; ზრდა — 497,9%;
  3. უკრაინა — 24,5 ათასი ვიზიტი; ზრდა — 1 932%;
  4. სომხეთი — 19,7 ათასი ვიზიტი; ზრდა — 101,9%;
  5. ისრაელი — 17,6 ათასი ვიზიტი; ზრდა — 70 116%;
  6. საქართველო (არარეზიდენტი) — 15 ათასი ვიზიტი; ზრდა — 293,3%;
  7. საუდის არაბეთი — 12,9 ათასი ვიზიტი; (გასული წლის ივლისში ამ ქვეყნის მოქალაქე საქართველოში არ შემოსულა);
  8. ყაზახეთი — 9,5 ათასი ვიზიტი; ზრდა — 1 684,3%;
  9. ბელარუსი — 9,4 ათასი ვიზიტი; ზრდა — 993%;
  10. აზერბაიჯანი — 8,4 ათასი ვიზიტი; ზრდა — 108,7%;

რაც შეეხება მიმდინარე წლის პირველი შვიდი თვის მაჩვენებლებს, როგორც საზღვრის კვეთის მონაცემებიდან ხდება ცნობილი, 2021 წლის იანვარ-ივლისში საქართველოში სულ 695 ათასი უცხოური ვიზიტი განხორციელდა, რაც გასული წლის იმავე პერიოდის მაჩვენებელს 45,5%-ით, ხოლო 2019 წლის იანვარ-ივლისის მონაცემს 83%-ით ჩამორჩება.

ამ ეტაპისთვის ტურიზმიდან მიღებული შემოსავლების მიმდინარე წლის პირველი ნახევრის მონაცემებია ცნობილი, რომლის მიხედვითაც იანვარ-ივნისში უცხოური ტურიზმიდან 299,8 მილიონი აშშ დოლარი მივიღეთ, რაც გასული წლის იმავე პერიოდის მაჩვენებელს 34%-ით ჩამორჩება. 2020 წლის პირველ ნახევარში ტურიზმიდან ქვეყანაში 456,5 მილიონი დოლარი შემოვიდა. როგორც ცნობილია, ტურიზმის მაჩვენებლების დრამატულად შემცირება პანდემიამ გამოიწვია.

აღსანიშნავია, რომ 2020 წლის პირველ ნახევარში, 2019 წლის იმავე პერიოდთან შედარებით, ტურიზმიდან მიღებული შემოსავლები 79%-ით არის შემცირებული, რადგან 2019 წლის იანვარ-ივნისში ტურიზმმა 1,46 მილიარდი დოლარის შემოსავალი მოგვიტანა.

მიუხედავად იმისა, რომ ბოლო თვეების განმავლობაში უცხოეთიდან განხორციელებული ვიზიტები და ამ ვიზიტებიდან მიღებული შემოსავლების რაოდენობა მზარდია, ტურიზმის მიმდინარე მაჩვენებლები პანდემიადელ მონაცემებს ჯერ კიდევ მნიშვნელოვნად ჩამორჩება.