21 მაისს, ავლაბრის მიმდებარე ტერიტორიაზე მომხდარ დაჭრაში ბრალდებული შინაგან საქმეთა სამინისტრომ დააკავა.

ინციდენტის შედეგად 2 ადამიანი, მათ შორის ერთ არასრულწლოვანი, დაჭრეს და ის დამოუკიდებელმა ლგბტ აქტივისტმა ჰომოფობიის ნიადაგზე მომხდარ თავდასხმად შეაფასა.

შს სამინისტროს ინფორმაციით, დაკავებულია 1998 წელს დაბადებული სერგო პ. ჯანმრთელობის განზრახ ნაკლებად მძიმე დაზიანების ბრალდებით.

"გამოძიებამ დაადგინა, რომ სერგო პ.-მ მიმდინარე წლის 21 მაისს თბილისში, ქეთევან წამებულის გამზირზე, ურთიერთშელაპარაკებისას, 1992 წელს დაბადებულ გიორგი ტ.-ს და 2000 წელს დაბადებულ ნუგზარ კ.-ს ხელისა და ფეხის არეში ცივი იარაღით ჭრილობები მიაყენა და შემთხვევის ადგილიდან მიიმალა. დაჭრილები სასწრაფო-სამედიცინო დახმარების ბრიგადამ საავადმყოფოში გადაიყვანა. მათი ჯანმრთელობის მდგომარეობა ამ დროისთვის სტაბილურია" - აცხადებენ შსს-ში.

სამინისტროს ინფორმაციით, დაკავებული ჩადენილ დანაშაულს აღიარებს. გამოძიება ჯანმრთელობის განზრახ ნაკლებად მძიმე დაზიანების ფაქტზე მიმდინარეობს საქართველოს სსკ-ის 118-ე მუხლის 1-ლი ნაწილით.