ლეიბორისტული პარტიის თავმჯდომარის განცხადებით, შარლ მიშელის დოკუმენტის ანულირების შესახებ ქართული ოცნების გადაწყვეტილება ქვეყანაში "გაცხადებული დიქტატურის" გამყარებაა.

"საქართველოს ვაი ხელისუფლებამ ჩვენს ქვეყანას და მსოფლიო დემოკრატიულ თანამეგობრობას თავზე გადაახია ე.წ. შარლ მიშელის ხელშეკრულება და განაცხადა, რომ არ აპირებენ ხელისუფლებიდან წასვლას, საარჩევნო დემოკრატიული ვალდებულებითი გზით. სწორედ ამის გამო არ მოვაწერეთ ხელი დოკუმენტს და სწორედ ამის გამო არ შევედით პარლამენტში, რადგან ზუსტად ვიცოდით, რას მოიმოქმედებდა მამა და მარჩენალი, რომელმაც მთელი საქართველო გადააგდო არაერთხელ. რა თქმა უნდა, არც ამჯერად თქვა უარი გადაგდებაზე და ძალაუფლების შემომტკიცებაზე კრემლთან შეთანხმებული სცენარებით", — განაცხადა შალვა ნათელაშვილმა ბრიფინგზე.

მისი თქმით, ქვეყანაში უნდა დაიწყოს ეროვნულ განმათავისუფლებელი მოძრაობა, ოპოზიციამ პარლამენტი დატოვოს, ხოლო ევროკავშირმა და აშშ-მ უნდა დააყადაღოს ბიძინა ივანიშვილის მილიარდები. მისი თქმით, ეს ყოველივე მალე დააყენებს შედეგს.

რამდენიმეთვიანი პოლიტიკური კრიზისის შემდეგ ევროკავშირის მედიაციითა და შარლ მიშელის პირადი ჩართულობით მიღწეული შეთანხმება ანულირებულია. ეს გადაწყვეტილება მმართველმა გუნდმა მიიღო, ბრალი კი ტრადიციულად ოპოზიციას დასდო. შესაბამისად, ქართული ოცნება უარს ამბობს აქამდე დაპირებულ 43%-იან ბარიერზე და აცხადებს, რომ ახალი არჩევნები მათი "კეთილი ნებით" 53%-ის მიღების შემთხვევაში ჩატარდება, თუ გადაწყვეტენ, რომ ოპოზიცია მზად არის კოალიციური მმართველობისთვის. შარლ მიშელის შეთანხმების ერთ-ერთი მთავარი ჩანაწერი სწორედ 43%-იანი ბარიერი იყო, რაც იმას ნიშნავდა, რომ თუ ქართულ ოცნებას თვითმმართველობის არჩევნებზე ამაზე ნაკლები შედეგი ექნებოდა, რიგგარეშე არჩევნები უნდა ჩატარებულიყო. ახლა ეს დათქმა აღარ არსებობს.