პარტია მოქალაქეების ერთ-ერთი ლიდერი, ლევან იოსელიანი ამბობს, რომ ის ოპოზიციაში ახლა ისეთ კანდიდატს ვერ ხედავს, რომ კახა კალაძის მერობა სათუო იყოს.

"კახა კალაძე რომ დღეს ასე ყოჩაღად და რეიტინგულად გამოიყურება, ამას აქვს თავისი მიზეზი, გარდა იმისა, რომ ის ძალიან კარგად მუშაობს თავისი იმიჯის შექმნაზე, გაზრდასა და შენარჩუნებაზე მთელი ეს პერიოდი, ამას ძალიან დიდი რესურსი დაუთმო, რასაც ვადევნებდი თვალყურს და გარდა ამისა, შევხედოთ ოპოზიციაში რა მოხდა ამ დროს, ოპოზიციამ რა გააკეთა იმისთვის, რომ შესაბამისი წონადი კანდიდატი ჰყოლოდა მერობის არჩევნებზე და მართლა, რეალურად ისეთი წინააღმდეგობის გაწევა იყოს შესაძლებელი, სადაც შეიძლება კალაძის მერობა ნამდვილად იყოს სათუო. მე დღეს ასეთ კანდიდატს ვერ ვხედავ. თუ ვინმე თვლის, რომ ასეთი კანდიდატი ჰყავს ოპოზიციას, მაშინ უნდა მითხრან და ვიტყვი, რომ ასეთი კანდიდატი არის", — ამბობს იოსელიანი პალიტრანიუსის ეთერში.

თბილისის მოქმედი მერი, კახა კალაძე ქართულმა ოცნებამ დედაქალაქის მერობის კანდიდატად 20 ივლისს ოფიციალურად წარადგინა.

18 მაისს ირაკლი კობახიძე აცხადებდა, რომ პარტიის მიერ ჩატარებულ კვლევებში კახა კალაძე რეიტინგით პირველ ადგილზე იყო.

2013 წლიდან დღემდე ის ქართული ოცნების გენერალური მდივნის თანამდებობას იკავებს. 2012 - 2017 წლებში საქართველოს ენერგეტიკის მინისტრი/ვიცე-პრემიერი იყო.

კალაძე თბილისის მერი 2017 წლის 21 ოქტომბერს გამართული თვითმმართველობის არჩევნებით გახდა.

2021 წლის ადგილობრივი თვითმმართველობის არჩევნები 2 ოქტომბერს გაიმართება. ოქტომბრის არჩევნები სხვა მსგავსი არჩევნებისგან იმით გამოირჩევა, რომ მისი შედეგები უშუალოდ გასაზღვრავს არა მხოლოდ მუნიციპალური ორგანოების დაკომპლექტებას, არამედ რიგგარეშე საპარლამენტო არჩევნების ჩატარების ბედს. იმ შემთხვევაში, თუ მმართველი პარტია, ქართული ოცნება პროპორციული წესით ხმათა 43%-ზე ნაკლებს მიიღებს, რიგგარეშე საპარლამენტო არჩევნები უნდა გაიმართოს.