"დაბრალებებს არ ვიყოთ. რა ძალადობა?" — ასე ეხმაურება ქართული ოცნების დეპუტატი, შალვა პაპუაშვილი კოლეგის, თინა ბოკუჩავას გამოყვანას ტრიბუნიდან ფიზიკური ძალის გამოყენებით.

პაპუაშვილს ძალადობას არ მიაჩნია კოლეგა ქალის ხელში აყვანა და მისი ნების საწინააღმდეგო, საპარლამენტო ტრიბუნიდან გაყვანა, თუმცა ამბობს, რომ სიმართლეზე, მორალზე და პარლამენტზე ძალადობა იყო ის, რასაც "ნაციონალური მოძრაობის წყალობით ბევრი წელი უყურებდა ქვეყანა და დღეს კიდევ ერთხელ ვიხილეთ პარლამენტში".

"თინასთან ვწუხვარ", — წერს დეპუტატი სოციალურ ქსელში, თუმცა, უცნობია რის გამო წუხს, თუ ფიქრობს, რომ მისი ქმედებაა ძალადობა არ ყოფილა.

შალვა პაპუაშვილმა თინა ბოკუჩავა ფიზიკური ძალის გამოყენებით გაიყვანა პარლამენტის თავმჯდომარის ტრიბუნიდან. როგორც ბოკუჩავა ამბობს, პირველად ამის მცდელობა ქართული ოცნების კიდევ ერთ დეპუტატს, ლევან მგალობლიშვილს, რომელსაც შემდეგ პაპუაშვილი შეუერთდა.

ხმაური და სიტყვიერი შეურაცხყოფა პარლამენტში მას შემდეგ დაიწყო, რაც ოპოზიციონერმა დეპუტატებმა შინაგან საქმეთა მინისტრს, ვახტანგ გომელაურს სიტყვა გააწყვეტინეს და ტრიბუნასთან გარდაცვლილი ოპერატორის, ლექსო ლაშქარავას ფოტოები გამოფინეს. ამის პარალელურად, პლენარულ სესიაზე ჟურნალისტებმა საპროტესტო ბანერი გადმოფინეს წარწერით — "დასაჯეთ მოძალადეები".

პროტესტის გამო მმართველმა გუნდმა გადაწყვიტა, რომ გომელაურის მოსმენა გადაედო.

"დაყენებული იქნა საკითხი უმრავლესობის მხრიდან, რომ ასეთ რეჟიმში განხილვის გაგრძელება ნამდვილად არ ემსახურება იმ მიზანს, რისთვისაც შევიკრიბეთ და დაინიშნა რიგგარეშე სხდომა. ამიტომ, დღევანდელ სხდომას ვაცხადებ დახურულად და საკითხზე ვიმსჯელებთ სხვა რიგგარეშე სხდომაზე", — განაცხადა პარლამენტის თავმჯდომარემ, კახა კუჭავამ.

გაიგე მეტი: