ეკონომიკის მინისტრის, ნათია თურნავა დარწმუნებულია, რომ ერთ-ორ წელიწადში პანდემიით მიყენებულ ზიანს გავანულებთ და განვითარების "აღმავალ ტრაექტორიას" დავუბრუნდებით. ამის შესახებ მან ბორჯომში უმრავლესობისა და მინისტრთა კაბინეტის გასვლითი სხდომის დროს ჟურნალისტებთან საუბრისას განაცხადა.

"მოგეხსენებათ, პრემიერმინისტრის დავალებით მთავრობა მუშაობს მართლაც უპრეცედენტო დოკუმენტებზე, რადგან ათწლიანი გეგმა ჩვენ არ დაგვიმუშავებია. ახლანდელი ვითარება, არსებული მაკროეკონომიკური სტაბილურობა და რეფორმების მიმართ შეუქცევადი დღის წესრიგი გვაძლევს საშუალებას, რომ ათწლიანი, საშუალოვადიანი გეგმით ვიაროთ, დავგეგმოთ კონკრეტული რაოდენობრივი მაჩვენებლები, თუ რას უნდა მივაღწიოთ 2025-2030 წელს. დღეს ასეთი პირველი საერთო განხილვა მოეწყო", — თქვა თურნავამ.

მისი განცხადებით, დღეს თითოეულმა სამინისტრომ, თავისი უწყების მიხედვით, კონკრეტული გეგმები წარმოადგინა, რომელიც მოიცავს არა მხოლოდ ზოგად ამოცანას, არამედ ძალიან კონკრეტულ ქმედებებს და კონკრეტულ საზომს, რომელ წელს რას უნდა მიაღწიონ.