პარტია მოქალაქეების ლიდერი, ალეკო ელისაშვილი ამბობს, რომ მხარს დაუჭერს ქართული ოცნების კანონპროექტს, რომელიც პარტიების დაფინანსების შეზღუდვას შეეხება.

"მე მიმაჩნია, რომ პოლიტიკას ყველა უნდა ეკიდებოდეს პასუხისმგებლობით. პოლიტიკა ჩემთვის არის ხალხის სამსახური. როდესაც ხალხი გირჩევს, მანდატს გაძლევს და პარლამენტში არ შედიხარ, მაგრამ დაფინანსებას იღებ, ეს ასე არ უნდა ხდებოდეს. მართალია, ეს წესი მომდევნო პარლამენტზე გავრცელდება, რომ ახლა პოლიტიკურ ანგარიშსწორებად არ ჩაითვალოს, მაგრამ მე ახლა გავრცელების მომხრეც ვიქნებოდი და ვარ. იმიტომ, რომ ეს რას ნიშნავს, აგირჩიეს, პარლამენტში არ დადიხარ, მუშაობა გეზარება, მაგრამ ფულს იღებ. მაშინ, იმ ფულზე, ხელფასზეც და პარტიულ დაფინანასებაზეც თქვი უარი", — ამბობს ელისაშვილი.

დღეს საქართველოს პარლამენტში მოქალაქეთა პოლიტიკური გაერთიანებების შესახებ კანონპროექტს მეორე მოსმენით განიხილავენ. ის პარტიებისთვის დაფინანსების შეწყვეტას ითვალისწინებს. გარდა ამისა, საუბარია, რომ თუ მომდევნო 6 თვის განმავლობაში მანდატმოპოვებული პარტიების წარმონადგენელთა ნახევარი მაინც არასაპატიო მიზეზით პლენარულ სხდომათა ნახევარს არ დაესწრება, მათ დაფინანსება დროებით შეუჩერდებათ.