დღეს, ბრიუსელში საქართველოსთვის უვიზო რეჟიმის საკითხსა და განახლებულ შეჩერების მექანიზმს, ევროკაშირის მინისტრებმა საბოლოოდ დაუჭირეს მხარი.

ამის შესახებ, რადიო თავისუფლების ბრიუსელის ბიუროს კორესპონდენტი, რიკარდ იოზვიაკი წერს ტვიტერის საკუთარ გვერდზე:

დღეს, საკითხი განიხილეს ევროკავშირის ქვეყნების ენერგეტიკისა და ტრანსპორტის მინისტრებმა და დაამტკიცეს ცვლილება რეგულაციაში, რომელიც საქართველოს მოქალაქეებისათვის უვიზო მიმოსვლის რეჟიმის შემოღებას ითვალისწინებს. იგი უკვე გამოქვეყნდა ევროკავშირის საბჭოს ოფიციალურ ვებგვერდზე.

2 თებერვალს, ევროპარლამენტმა პლენარულ სხდომაზე დაუჭირა მხარი საქართველოსთვის უვიზო მიმოსვლას, რაც საკითხის პოლიტიკურ დონეზე გადაწყვეტის ბოლო ეტაპი იყო.

განახლებულ დოკუმენტზე ოფიციალური ხელმოწერის ცერემონიალი პირველ მარტს გაიმართება, ბრიუსელში.

მას შემდეგ, რაც ევროპარლამენტის პრეზიდენტი და ევროკავშირის საბჭოს თავმჯდომარე ქვეყნის შესაბამისი წარმომადგენელი მოაწერენ ხელს ცვლილებას, იგი ევროკავშირის ოფიციალურ ჟურნალში, ანუ საკანონმდებლო მაცნეში გამოქვეყნდება.

დოკუმენტის გამოქვეყნებიდან ზუსტად ოც დღეში, ბიომეტრიული პასპორტის მქონე საქართველოს მოქალაქეები შენგენის ზონაში უვიზოდ მიმოსვლას შეძლებენ. სავიზო ლიბერალიზაცია გულისხმობს მოკლევადიან ვიზიტებს, ანუ 90 დღეს ნებისმიერი 180 დღის განმავლობაში.

რა უნდა ვიცოდეთ ევროკავშირში უვიზოდ მოგზაურობისთვის?