საქართველოს პრეზიდენტის, გიორგი მარგველაშვილის განცხადებით, უშიშროების საბჭომ ეროვნული უსაფრთხოების საკითხებზე საზოგადოებრივი დისკუსია უნდა წამოიწყოს. პრეზიდენტის თქმით, ეროვნული უსაფრთხოების საკითხებზე საზოგადოებრივი დისკუსია და ფართო ჩართულობა აუცილებელია, რათა შეიარაღებული ძალები უფრო გაძლიერდეს.

ამის შესახებ მან დღეს, პრეზიდენტის სასახლეში გამართულ ბრიფინგზე ისაუბრა:

"შეიარაღებული ძალები არ არის ქვეყნის თავდაცვის ერთადერთი ფორმა, არამედ, ყველა საზოგადოებრივ პოლიტიკური ინსტიტუტი უნდა იყოს თანხმობაში თუ როგორ დავიცვათ ჩვენი ქვეყანა. მათ შორის, შეიარაღებული ძალებიც მოქმედებენ ამ ერთიანი მხარდაჭერით, გაერთიანებული საზოგადოების მხარდაჭერის ფონზე და მაშინ არის მათი მოქმედება ეფექტური და შედეგიანი. შესაბამისად დისკუსია, რომელსაც ჩვენ ვიწყებთ, დისკუსია რომლის ფარგლებშიც ჩვენ შევეცდებით ერთმანეთს გავუზიაროთ, რანაირად და როგორ უნდა იქნას გაერთიანებული საზოგადოებრივ-პოლიტიკური შეიარაღებული რესურსი, ერთიან, ძალიან მდგრად სისტემაში".

ეროვნული უშიშროების საბჭოს მდივნის, დავით რაქვიაშვილის განმარტებით, დაწყებული დისკუსიის მიზანია საოკუპაციო ხაზის მიმდებარედ მცხოვრები მოქალაქეებს "უსაფრთხოების შეგრძნების გაგება":

"ჩვენი ამოცანაა საქართველოს თითოეულ რეგიონში იმ უსაფრთხოების შეგრძნებების შესახებ გავიგოთ, რომელიც იქ არსებობს. ოკუპაციის ხაზთან ჩვენი თანამოქალაქეები ჩვენზე მეტად, გაცილებით უფრო დაუცველები არიან. ეს შეგრძნებები უნდა ვიცოდეთ, რომ შევძლოთ ჩამოვაყალიბოთ ერთიანი ეროვნული დამოკიდებულება".