თურქეთის კიბერ პოლიციამ 2016 წელს 1 734 პირი დააპატიმრა სოციალური ქსელების საშუალებით "ტერორიზმის და ტერორისტთა მხარდამჭერი" პროპაგანდის გავრცელების ბრალდებით. თურქული საინფორმაციო სააგენტო Anadolu-ს ცნობით, 2016 წლის 15 ივლისის გადატრიალების მცდელობის შემდეგ, სოციალური ქსელებით ინფორმაციის გამავრცელებელთა ანგარიშები შეისწავლა და სულ 22 ათასზე მეტი ანგარიშის მფლობელის იდენტიფიცირება შეძლო, ისინი მუშაობას აგრძელებენ სოციალური ქსელების მომხმარებელთა 40 ათასზე მეტი ანგარიშის მფლობელთა დასადგენად.

თავდაპირველად, დაკავებულთა რაოდენობა 3 ათასზე მეტი იყო, თუმცა მათი ნაწილი პირობით გაათავისუფლეს, რაც შეეხება იდენტიფიცირებულ 22 ათას პირს, ისინი დაკავების საფრთხის წინაშე არიან, რადგან ჯერ გამოძიება არ დასრულებულა და პროკურორებსაც არ მიუღიათ საბოლოო გადაწყვეტილება.

2016 წლის 15 ივლისს, თურქეთში გადატრიალების მცდელობის შემდეგ, დააპატიმრეს 20 ათასზე მეტი პირი, მათ შორის არიან სამხედროები, სამართალდამცავები, პროკურორები, მასწავლებლები, მოსამართლეები, ჟურნალისტები და სხვა პროფესიის ადამიანები. რაც შეეხება სამსახურიდან გათავისუფლებულ იგივე პროფესიის ადამიანებს, მათი რაოდენობა 80 ათასს აღემატება.

თურქეთის ხელისუფლება ამტკიცებს, რომ გადატრიალების მცდელობის უკან ამერიკაში მცხოვრები, წარმოშობით თურქი სასულიერო პირი, ფეტულა გიულენი იდგა, თუმცა, გიულენი ამ ბრალდებებს უარყოფს.