საქართველოს პრემიერმინისტრი ირაკლი ღარიბაშვილი ბაქოში აზერბაიჯანის პრეზიდენტს, ილჰამ ალიევს შეხვდა. შეხვედრა ზაგულბას სასახლეში გაიმართა.

მთავრობის მიერ გავრცელებულ განცხადებაში აღნიშნულია, რომ მხარეებმა ორ ქვეყანას შორის არსებულ სტრატეგიულ პარტნიორობასა და მეგობრულ ურთიერთობებზე ისაუბრეს.

"თქვენ ბრძანეთ, რომ ბრწყინვალე ურთიერთობა გვაქვს და რომ ეს ძმობა საუკუნეებს ითვლის. თქვენი მამის მიერ თბილისში ნათქვამი სიტყვები მინდა გავიხსენო, რომელმაც ბრძანა, რომ ჩვენ მეზობლობა ბედმა გვარგუნა. ქართველი და აზერბაიჯანელი ერების მეზობლობა ჩვენი ბედისწერაა. ამდენად, ურთიერთდაკავშირებულნი და ურთიერთდამოკიდებულნი ვართ", — აღნიშნა ირაკლი ღარიბაშვილმა.

აზერბაიჯანის პრეზიდენტმა ერთობლივ პროექტებზე ისაუბრა, რამაც გავლენა იქონია როგორც პოლიტიკურ, ეკონომიკურ და სატრანსპორტო სიტუაციაზე. მან ყურადღება გაამახვილა სამხრეთის გაზის მილსადენის პროექტზე და მის მნიშვნელობას გაუსვა ხაზი.

"ახლახან გარკვეულ მონაცემებს გადავავლე თვალი და შევიტყვე, რომ აზერბაიჯანი საქართველოს ეკონომიკაში კვლავ უმსხვილეს ინვესტორებს შორისაა. ეს ქვეყანაში განხორციელებული რეფორმების დამსახურებაა, რითაც დადებითი და ხელსაყრელი საინვესტიციო კლიმატი შეიქმნა. ვიცი, რომ ბევრ აზერბაიჯანულ კომპანიას სურს თქვენს ქვეყანაში მუშაობა და იმედი მაქვს, რომ ასეც მოხდება", — განაცხადა ალიევმა.

ირაკლი ღარიბაშვილი ბაქოში ვიზიტით 5 მაისს ჩაფრინდა. შეხვედრები დაგეგმილია ალი ასადოვთან და აზერბაიჯანის რესპუბლიკის მილიმეკლისის თავმჯდომარესთან, საჰიბა გაფაროვასთან.

ოფიციალურ დელეგაციაში პრემიერ-მინისტრთან ერთად ვიცე-პრემიერი, საგარეო საქმეთა მინისტრი დავით ზალკალიანი იმყოფება.