ლელოს ლიდერები, ბადრი ჯაფარიძე, მამუკა ხაზარაძე და გრიგოლ გეგელია მომდევნო კვირაში ბრიუსელში გაემგზავრებიან. ჯაფარიძის განცხადებით, სამუშაო ვიზიტი საერთაშორისო პარტნიორების მოწვევით დაიგეგმა და შექმნილ კრიზისზე საუბარს აპირებენ.

"შემდეგ კვირაში მოწვევით მივდივართ ბრიუსელში, სადაც გვექნება შეხვედრა ევროპარლამენტარებთან, ევროკოიმისიაში. გვაქვს ძალიან ბევრი შეხვედრა დაგეგმილი. გვექნება საშუალება, კვლავ ვისაუბროთ შექმნილ ვითარებაზე, გამოსავლის გზებზე.

ჩვენი პარტნიორები არიან სრულად ინფორმირებული ოპოზიციის მიდგომებზე, განზრახვაზე, რომ, რა თქმა უნდა, ჩვენი ამოცანაა შედგეს შეთახნმება და იმ დარჩენილ 2 საკითხზეც ისეთ შეთანხმებას მივაღწიოთ, რომელიც არ იქნება ყალბი ფორმულირება, მაგრამ იქნება რეალური და სამართლიანი ფორმულირება", — განაცხადა მან TV პირველის ეთერში.

არსებული ინფორმაციით, ვიზიტი ოპოზიციასთან კოორდინაციაშია, თუმცა პარტია თავისი დღის წესრიგით მიდის, რომელიც არ ცდება ოპოზიციის ხედვებს. მათივე განმარტებით, განხილვის მთავარი თემები იქნება შარლ მიშელის გეგმა და ქართული ოცნების გადაწყვეტილება დოკუმენტის ხელმოწერის შესახებ.