"იმედია, მეორედ აქ შეკრება არ მოგვიწევს. დანარჩენი დამოკიდებულია სასამართლოზე", – ასე დაასრულა რუსთავი 2–ის მხარდამჭერი აქცია რუსთაველის გამზირზე, პარლამენტის მიმდებარე ტერიტორიაზე.

რუსთავი 2–ის მიერ ორგანიზებულ აქციას ესწრებოდნენ სხვადასხვა მედიასაშუალების ჟურნალისტები, პოლიტიკოსები, სამოქალაქო აქტივისტები.

აქციაზე ისმოდა მოწოდებები ხელისუფლების მიმართ, რომ შეწყვიტონ ბრძოლა რუსთავი 2–ის, სიტყვის თავისუფლებისა და დემოკრატიის წინააღმდეგ.

რუსთავი 2–ის მხარდამჭერები ამბობდნენ, რომ ისინი კონკრეტული ტელეარხის დაცვით იცავენ სიტყვის თავისუფლებას.

უახლოეს მომავალში უზენაესმა სასამართლომ უნდა გამოაცხადოს საბოლოო გადაწყვეტილება რუსთავი 2–ის საქმეზე, რომლითაც რუსთავი 2 დარჩება ან ძმებ ყარამანიშვილებს, ან ქიბარ ხალვაშს, რომელმაც ორი ინსტანციის სასამართლო უკვე მოიგო.