ნაციონალური მოძრაობის თავმჯდომარე, ნიკა მელია აცხადებს, რომ აზრს ვერ ხედავს შეთანხმებაზე ხელის მოწერაში, სადაც არ იქნება ახალი არჩევნები ან მასთან მისასვლელი რაიმე ქმედითი გზა. ამის შესახებ მან ციხიდან, TV პირველისთვის მიცემულ ინტერვიუში ისაუბრა.

"არჩევნების გარეშე ქვეყანაში კლიმატი ვერ შეიცვალა, მგონი ეს დღეს ბავშვსაც კი ესმის ამ ქვეყანაში. ოპოზიციის ბრძოლა არ არის ბრძოლა ბრძოლისთვის, ეს არის სახელმწიფოს სასარგებლოდ, შედეგზე გათვლილი ბრძოლა. ამიტომ აზრს ნამდვილად ვერ ვხედავ ისეთ შეთანხმებაზე ხელის მოწერაში, სადაც არ იქნება მთავარი — ახალი არჩევნები, რომელიც კრიზისს დაძლევს, ან სხვა არჩევნებამდე მისასვლელი ნებისმიერი გზა", — აცხადებს მელია.

ჟურნალისტის კითხვას, რას იზამს, თუ მის ნაცვლად გირაოს გადაიხდიან, მელია პასუხობს, რომ გირაოს ფორმალური მოთხოვნა აღარ არსებობს, რადგან უკვე პატიმრობა აქვს შეფარდებული. ამასთან, მისი თქმით, ეს გირაო კი არა, გამოსასყიდია.

"ფართოდ მეღიმება, როცა ვიღაცა ამბობს, გირაო გადაიხადოსო. ჯერ ერთი, გირაოს გადახდის ფორმალური მოთხოვნა აღარ არსებობს, ანულირებულია, პატიმრობა მაქვს შეფარდებული. ამას თავი რომ დავანებოთ, გირაოს კი არ ითხოვენ, ხარკსაც კი არ ითხოვენ, გამოსასყიდს მთხოვენ თავისუფლებისთვის. შესაძლებლობა რომ მქონდეს, ციხიდან გამოვიქცეოდი პროტესტის ნიშნად, რადგან უკანონო პატიმრობაა", — თქვა მელიამ.

გარდა ამისა, ენმ-ის თავმჯდომარის განცხადებით, ხელისუფლების მოთხოვნა ნიშნავს "თავისუფლების ყიდვას" ისე, რომ გაყალბდეს 20 ივნისის მოვლენები, რაც, მისი თქმით, გამორიცხულია.

"გამოსასყიდით იყიდე თავისუფლებაო და თან ისეო, რომ საქართველოს ისტორიის უკანასკნელი უმნიშვნელოვანესი თარიღი, 20 ივნისი გამაყალბებინეო, ანუ ანტისაოკუპაციო აქციის შინაარსი შევცალოთო და თავისუფლების მოყვარე პატრიოტებს დამნაშავეები დავარქვათ და დამნაშავეებს, ივანიშვილის პირად მცველებს პატრიოტებიო, ისტორიამ ეს ამბავი ასე შემოინახოსო. ფული გადაიხადე, პარლამენტში შემოდი და 20 ივნისზე ამნისტიას ხელი მოაწერეო. გამორიცხულია ეს, ჩემთვის გირაოს არგადახდაზე მეტად პრინციპული არის, რომ ჩემი თავისუფლება არ გაიცვალოს ისტორიის უმნიშვნელოვანეს თარიღში და ისტორია ამით არ გაყალბდეს", — თქვა მელიამ და დასძინა, რომ ვინც გირაოს გადაიხდის, ვერ იქნება მისი და ქვეყნის კეთილმოსურნე.