გირჩი — მეტი თავისუფლების ლიდერის, ზურაბ ჯაფარიძის განცხადებით, სიტყვა, რაც ქართული ოცნების ქმედებას ზუსტად აღწერს, არის "ვირეშმაკობა". მისი თქმით, მმართველი პარტია ცდილობა, ჯერ ოpოზიციას დაეფიქსირებინა საკუთარი აზრი, რომ შემდეგ ეთქვათ, დოკუმენტზე ხელს ოპოზიცია არ აწერსო. ამის შესახებ მან ტელეკომპანია ფორმულას გადაცემა კომენტარში ისაუბრა.

"იყო ბოლო ერთიანი შეკრება, სადაც ჩვენ მოგვეცა საშუალება გაგვეგო ქართული ოცნების პოზიცია, რაც იყო. სინამდვილეში ისინი იტყუებიან, რასაც ამბობენ. თუ მათ ხელის მოწერა უნდოდათ, ხელი უნდა მოეწერათ დოკუმენტზე. მაგისთვის საერთოდ არ იყო საჭირო მეორე მხარის ხელმოწერა. უბრალოდ, ყველაზე ზუსტი სიტყვა, რაც აღწერს მათ ქმედებას, არის ვირეშმაკობა. მათ ჰქონდათ მცდელობა ჯერ ოპოზიციას დაეფიქსირებინა საკუთარი აზრი, იცოდნენ, რომ ოპოზიცია მაგ ტექსტზე, არჩევნებისა და პოლიტპატიმრების ნაწილში არ დათანხმდებოდა და შემდეგ ეთქვათ, რომ აი, ოპოზიცია არ აწერს ხელსო.

თუმცა, მე მინდა, ცალსახად ვთქვა, რომ კონკრეტულად ბატონი დანიელსონის დამსახურებაა, რომ ის მართლა ღირსეულად და პატიოსნად მოიქცა. აიძულა ისინი, ერთსა და იმავე შეკითხვის ბევრჯერ გამეორებით უთხრა — მოდი, ეს ორი საკითხი სრულად დავივიწყოთ და დანარჩენ 3 საკითხზე თუ ხართ თანახმა ხელი მოაწეროთო. რაზეც თავიდან ისხლიტავდნენ პასუხს, იძახდნენ, რომ ჩონჩხზე ვართ თანახმაო და მერე ამ სამ პუნქტზე მოუწიათ კონკრეტული პოზიციის დაფიქსირება და უცებ გაირკვა, რომ ორი ბლოკნოტი ჰქონდათ მოტანილი გავსებული შენიშვნებით. არაფერზე არ თანხმდებოდნენ", — ამბობს ჯაფარიძე.

ქართული ოცნება და ოპოზიცია ისევ ვერ შეთანხმდნენ. მათ ევროპული საბჭოს პრეზიდენტის შარლ მიშელის წარმომადგენლის, კრისტიან დანიელსონის მიერ შეთავაზებულ დოკუმენტს ხელი არ მოაწერეს. შეხვედრის შემდეგ მხარეებმა ისაუბრეს, რომ იყო საკითხები, რაზეც თანხმდებოდნენ, მაგრამ ნაწილზე — ვერა. მაგალითად, ლელოს ლიდერმა, ბადრი ჯაფარიძემ განაცხადა, რომ ნაციონალური მოძრაობის ლიდერ ნიკა მელიასთან დაკავშირებით შემოთავაზებული იქნა გადაწყვეტილება, რომელიც სრულად პასუხობდა პრობლემის გადაჭრას, თუმცა ეს არ განმეორდა გიორგი რურუას შემთხვევაში.

დანიელსონი მხარეებთან შეხვედრამდე საქართველოს პრეზიდენტს, სალომე ზურაბიშვილს შეხვდა თუმცა შეხვედრის შესახებ პრეზიდენტის ადმინისტრაციას წინასწარ ინფორმაცია არ გაუვრცელებია. ამასთან, შეხვედრის დასრულების შემდეგ, მათ არ გაავრცელეს არც ფოტოები და არც ვიდეო. მიშელის წარმომადგენელი საქართველოში მეორედ 27 მარტს ჩამოვიდა. ის 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს, ხოლო 29 მარტს პოლიტიკურ პარტიებს ინდივიდუალურ ფორმატში შეხვდა.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.