რესპუბლიკური პარტიის ერთ-ერთი ლიდერის, ხათუნა სამნიძის განცხადებით, დარწმუნებულია, რომ ქართული ოცნება და ოპოზიცია შეთანხმებას მიაღწევენ.

"მე ყოველთვის ვიყავი ამ პროცესში პოზიტიურად განწყობილი და ოპტიმისტურად, რადგან იმდენად მაღალ რანგშია აყვანილი ეს მოლაპარაკებები, იმდენად დიდია ჩართულობა. დღეს ახალი დიპლომატი დაემატა ამ პროცესს და უფრო დიდი მნიშვნელობა მიანიჭა ამ პროცესს. იმდენად მნიშვნელოვანია ეს ჩვენი ევროპელი და ამერიკელი პარტნიორებისთვის, რომ დარწმუნებული ვარ, მივალთ შეთანხმებამდე. ეს იქნება რთული გზა, შეთანხმება არ იქნება ადვილი, ჩემი აზრით, რადგან კომპრომისი ყოველთვის ნიშნავს, რომ არცერთი მხარე არ არის ისე კმაყოფილი, როგორც გვინდა რომ ვიყოთ. ეს არის მოლოდინი, მაგრამ კმაყოფილი ვიქნებით იმით, რომ ამ ორმა ძალიან დაპირისპირებულმა მხარემ შეძლეს შეთანხმება და ხელი მოეწერა დოკუმენტს, რომლითაც ეს ქვეყანა კიდევ ერთ მტკიცე ნაბიჯს გადადგამს წინ", — განაცხადა სამნიძემ.

ევროპული საბჭოს პრეზიდენტის, შარლ მიშელის წარმომადგენელი, კრისტიან დანიელსონი საქართველოში მეორედ 27 მარტს ჩამოვიდა. ის 28 მარტს საქართველოში ევროკავშირისა და ამერიკის შეერთებული შტატების ელჩსა და არასამთავრობო სექტორის წარმომადგენლებს შეხვდა. მიშელის წარმომადგენელი პოლიტიკურ პარტიებს დღეს, 29 მარტს ხვდება.

დანიელსონის პირველი ვიზიტის დროს, 18 მარტს ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

შვედი დიპლომატი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.