ქართული ოცნების წევრის, ნიკოლოზ სამხარაძის განცხადებით, ყოფილი პრემიერმინისტრი, გიორგი გახარია უმრავლესობის წევრებს არწმუნებდა, რომ ნაციონალური მოძრაობის თავმჯდომარისთვის იმუნიტეტი უნდა მოეხსნათ. ამის შესახებ მან დღის კურიერის ეთერში განაცხადა.

"გახარია უმრავლესობის სხდომაზე არწმუნებდა უმრავლესობის ყველა წევრს, ვისაც შეიძლებოდა ცოტა განსხვავებული პოზიცია ჰქონოდა იმაში, რომ ნიკა მელიას უნდა მოხსნოდა იმუნიტეტი აუცილებლად იმიტომ, რომ სხვა მხრივ ეს არ იქნებოდა სწორი სამართლებრივად", — აღნიშნა სამხარაძემ.

როგორც დეპუტატი აღნიშნავს, თუ რატომ შეიცვალა გახარიამ პოზიცია, მისთვის უცნობია და გადადგომის შესახებ განცხადებაც მოულოდნელი იყო.

ნიკა მელიასთვის პატიმრობის შეფარდებიდან რამდენიმე საათში 18 თებერვალს საქართველოს პრემიერმინისტრი, გიორგი გახარია გადადგა. გახარიას გადადგომიდან რამდენიმე წუთში კი, შსს-მ მელიას საქმეზე დაგეგმილი ღონისძიება "დროებით" გადადო.

გახარიამ მაშინ განაცხადა, რომ მისი ურყევი პოზიციაა, "ერთი კონკრეტული ადამიანის მიმართ თუნდაც კანონიერი, მართლმსაჯულებით განსაზღვრული ღონისძიების აღსრულება, თუ ეს რისკს უქმნის ჩვენი მოქალაქეების ჯანმრთელობას, სიცოცხლეს ან საერთოდ ქვეყანაში ქმნის პოლიტიკური ესკალაციის შესაძლებლობას, არის მიუღებელი".

პრემიერობიდან გადადგომიდან ერთი თვის თავზე გიორგი გახარიამ ჟურნალისტებს პირველად განუცხადა, რომ პოლიტიკიდან წასვლას არ აპირებს.