გირჩი — მეტი თავისუფლების ლიდერის, ზურაბ ჯაფარიძის განცხადებით, ყველაფერზე თვალის დახუჭვა და შემდეგი 4 წლის განმავლობაში ქართული ოცნების ყოფილი თავმჯდომარის, ბიძინა ივანიშვილის მმართველობაზე "შეგუება", ნიშნავს "უპასუხისმგებლობასა და კრიზისის დროში უფრო გაწელვას". ამის შესახებ მან საკუთარ ფეისბუქზე დაპოსტა და თქვა, რომ ეს დასავლეთმაც უნდა გაიაზროს და შესაბამისად, მოლაპარაკებების პროცესისადმი მიდგომა შეცვალოს.

"ნაცვლად იმისა, რომ დეფაქტო ხელისუფლებასა და ოპოზიციას ერთნაირად მოუწოდებდნენ კომპრომისებისა და შეთანხმებისკენ, ივანიშვილს და ქართულ ოცნებას უნდა უთხრან გასაგებად, ერთმნიშვნელოვნად და საჯაროდ: ის რომ მთელი ძალაუფლება ერთი ადამიანის და პარტიის ხელშია, სასამართლო პოლიტიზებულია, ქვეყანაში პოლიტიკური დევნაა და არჩევნებისადმი ნდობა არ არსებობს — თქვენი პასუხისმგებლობაა;

ჩვენთან თუ გინდათ, ევროატლანტიკურ სტრუქტურებში, ეს ყველაფერი უნდა შეცვალოთ დღესვე (არა ზეგ და 7 წელში), იმიტომ რომ ჩვენთან, დასავლეთში ასეა. მხოლოდ ეს შეილება იყოს შარლ მიშელის 5 პუნქტის შინაარსი და მხოლოდ ასეთი მიდგომით ჩვენი მეგობრების მხრიდან არის შესაძლებელი იმ პუნქტებზე შეთანხმება", — წერს ის.

მისი განცხადებით, ნებისმიერ დემოკრატიაზე პრეტენზიის მქონე ქვეყანაში კრიზისის განმუხტვისთვის არსებობს მხოლოდ ერთი გზა — ხელახალი არჩევნები, ხოლო ქართული ოცნება აცხადებს, რომ ეს "წითელი ხაზია". ჯაფარიძის თქმით, მმართველი პარტიისთვის წითელი ხაზი არა ვადამდელი არჩევნები, არამედ "ძალაუფლების დაკარგვაა", რადგან მათ "წესიერი არჩევნების გზით ძალაუფლების დაკარგვის ეშინიათ".

"ამ ფონზე ჩვენმა დასვლელმა მეგობრებმა, ზემოთ აღწერილი არაერთი მძიმე გამოწვევის გათვალისწინებით, გადაწყვიტეს ჩვენი დახმარება და დეფაქტო ხელისუფლებასა და ოპოზიციას შორის მომრიგებლის როლის საკუთარ თავზე აღება. ამისთვის მათ მხოლოდ მადლობა ეკუთვნით, განსაკუთრებით ევროკავშირისა და აშშ-ის ელჩებს. მოლაპარაკების რაუნდებმა პრაქტიკულად უშედეგოდ ჩაიარა და ახლა ყველა ველით ევროპული საბჭოს პრეზიდენტის პირადი წარმომადგენლის, ბ-ნი დანიელსონის მეორე ვიზიტს იმის იმედით რომ ახლა მაინც მოხდება რაიმე შეთანხმების მიღწევა და პოლიტიკური კრიზისის განმუხტვა", — ამბობს ის.

ჯაფარიძე აღნიშნავს იმასაც, რომ ამ მომენტისთვის "სრულად გაუგებარია", რა შეიძლება მოხდეს მეორე ვიზიტის დროს ისეთი, რომ მოლაპარაკებების დინამიკა შეიცვალოს და მხარეები შეთანხმებამდე მივიდეს, ამიტომ მისი განცხადებით:

• პოლიტიკური დევნა უნდა შეწყდეს;
• სასამართლო უნდა იყოს დამოუკიდებელი;
• ძალაუფლება უნდა იყოს გადანაწილებული და ოპოზიცია აღჭურვილი უნდა იყოს პოლიტიკაზე გავლენის მოსახდენად საჭირო რეალური ბერკეტებით;
• ქვეყანაში უნდა ტარდებოდეს თავისუფალი და სამართლიანი არჩევნები;
• არჩევნები უნდა ტარდებოდეს სრულად პროპორციული, ბუნებრივ ბარიერიანი სისტემით;
• ხელისუფლებას უნდა გააჩნდეს საკმარისი პასუხისმგებლობა იმისათვის, რომ ქვეყნის ასეთ ვითარებმდე მიყვანის შემთხვევაში, და ყველა სხვა გამოწვევების გათვალისწინებით, დანიშნოს ვადამდელი არჩევნები.

მისი განცხადებით, ის ელოდება, რომ სწორედ ეს იქნება ევროპული საბჭოს პრეზიდენტის წარმომადგენლის გზავნილები მეორე ვიზიტის დროს.

22 მარტს შარლ მიშელმა განაცხადა, რომ დანიელსონი საქართველოში მედიაციის გასაგრძელებლად დაბრუნდებოდა. მისი თქმით, საქართველოს მოქალაქეების ინტერესებისთვის, კომპრომისებზე წავსლის დროა. დანიელსონის ბოლო ვიზიტის დროს, ქართული ოცნებისა და ოპოზიციის შეხვედრები უშედეგოდ დასრულდა. ბოლო შეხვედრა 10 საათი გრძელდებოდა.

დანიელსონი საქართველოში არსებული პოლიტიკური ვითარების განმუხტვის მიზნით მიშელის გადაწყვეტილებით ჩამოვიდა. შუამავლის საქართველოში მივლინება ევროკავშირის უმაღლეს წარმომადგენელ ჟოზეფ ბორელთან შეთანხმებით, საქართველოში ევროკავშირის მიერ მხარდაჭერილი შუამავლობისა და პოლიტიკური დიალოგის პროცესის ფარგლებში გადაწყდა.