პარტია სტრატეგია აღმაშენებელის თავმჯდომარის, გიორგი ვაშაძის თქმით, პრემიერმინისტრ ირაკლი ღარიბაშვილთან ერთად ერთ მაგიდასთან დაჯდომა მისთვის სასიამოვნო არ იქნება, თუმცა ამბობს, რომ საკითხს ცივი გონებით მიუდგება.

"სასიამოვნო ნამდვილად არ იქნება, მაგრამ ცივი გონებით მივუდგები ამ საკითხს და სახელმწიფო და ქვეყნის კრიზისიდან გამოსვლიდან გამომდინარე, მზად ვარ, მივიდე ამ მოლაპარაკებებზე. ხაზს ვუსვამ, რომ ჩვენ ერთი ერთში არ გვაქვს მოლაპარაკებები და ესეც ის სამწუხარო უბედურებაა, რაც ქართულმა ოცნებამ ამ ქვეყანას მოუტანა, იმიტომ, რომ ნულოვანი ნდობა გვაქვს იმ მხარესთან მიმართებით, ვინც მოდის მოლაპარაკებებზე", — თქვა ვაშაძემ რუსთავი 2-თან.

მისივე თქმით, ქართულ ოცნებას არ უნდა მიეცეს საშუალება, მოლაპარაკებები ჩაშალოს. გიორგი ვაშაძე, ასევე, ამბობს, რომ ხელისუფლებიდან ვინ იქნება მომლაპარაკებელი, ამას დიდი მნიშვნელობა არ აქვს, რადგან გადაწყვეტილების მიმღები ვინ არის, ეს ყველასთავის კარგად არის ცნობილი.

ხელისუფლებისა და ოპოზიციის წარმომადგენლებს შორის შარლ მიშელის მონაწილეობით შეხვედრა პრეზიდენტის ადმინისტრაციაში პირველ მარტს გაიმართა. შეხვედრაზე პოლიტიკური დიალოგის განახლების 6-პუნქტიან გეგმაზე იმსჯელეს.

მას შემდეგ, რაც სავრაუდოდ, ირაკლი ღარიბაშვილის, ბერა ივანიშვილისა და ანზორ ჩუბინიძის მონაწილეობით ფარული ჩანაწერი გავრცელდა, მოლაპარაკების გაგრძელება კითხვის ნიშნის ქვეშ დადგა. ოპოზიციის ნაწილმა მოითხოვა, რომ ღარიბაშვილი მოლაპარაკებებს აღარ დაესწროს, თუმცა ოპოზიციის საერთო შეხვედრის შემდეგ პარტიებმა განაცხადეს, რომ მმართველ გუნდს მოლაპარაკების ჩაშლის საბაბს არ მისცემენ.

გაიგეთ მეტი: