საქართველოს პრემიერმინიტრობის კანდიდატმა, ირაკლი ღარიბაშვილმა პარლამენტში, კონსტიტუციის დღესთან დაკავშირებით გამართულ საზეიმო ღონისძიებაზე სიტყვის გამოსვლის დიდი ნაწილი ყოფილი ხელისუფლების კრიტიკას დაუთმო. მისი თქმით, ნაციონალურმა მოძრაობამ კონსტიტუცია ერთი ადამიანის ნება-სურვილს დაუქვემდებარა და ეს დოკუმენტი ფეხქვეშ ჰქონდათ გათელილი.

"ჩვენ არ უნდა დაგვავიწყდეს, რომ საქართველოს დამოუკიდებლობის აღდგენიდან, კონსტიტუციამ, რომელიც საამაყო უნდა იყოს ნებისმიერი სახელმწიფოს მოქალაქეებისთვის, იმდენი ტრანსფორმაცია განიცადა, რომ გადაიქცა ტექსტად, რომელმაც დაკარგა ეროვნული შეთანხმების მნიშვნელობა. 2012 წლის პირველ ოქტომბერს ქართულმა ოცნებამ გამარჯვება მოიპოვა სწორედ ისეთი ძალის დამარცხებით, რომელსაც, პირდაპირ უნდა ითქვას, უზურპირებული ჰქონდა ხელისუფლება, მიტაცებული, როგორც მთელი ძალაუფლება, ასევე, კონტროლიც ყველა სახელისუფლო თუ საზოგადოებრივ ინსტიტუტზე. უნდა ითქვას პირდაპირ, მეგობრებო, რომ ამ ძალას ფეხქვეშ გათელილი ჰქონდა კონსტიტუცია. 1995 წელს მიღებული კონსტიტუცია ერთი ადამიანის ნება-სურვილს დაექვემდებარა და დას მოერგო. ჩვენ ყველას გვახსოვს, რომ ქვეყნის მმართველობის ფორმის გადაყვანა საპრეზიდენტო რესპუბლიკის მოდელიდან საპარლამენტო მმართველობის მოდელზე, მხოლოდ იმ ერთადერთი მიზნით მოხდა, რომ უვადოდ გაგრძელებულიყო მოძალადე ხელისუფლის მმართველობა. სწორედ ამგვარად იყო დაჭრილი და დაჩეხილი ის დოკუმენტი, როდესაც ქართველი ხალხის ნებით, ანტიკონსტიტუციური მმართველობა შეიცვალა", — თქვა ღარიბაშვილმა.

მან ასევე აღნიშნა, რომ კონსტიტუციის მმართველობის მოდელთან შესაბამისობაში მოყვანა 2016 წელს ქართულმა ოცნებამ დაიწყო და ამ "უდიდეს საქმეში წამყვანი როლი შეასრულა ბატონმა ირაკლი კობახიძემ". ღარინაშვილის თქმით, შედეგად, საქართველოს კონსტიტუციამ ისეთივე თანამედროვე, ევროპული სტანდარტის ფორმა მიიღო, როგორიც იყო მისი 100 წლის წინამორბედი.

100 წლის წინ, 1921 წლის 21 თებერვალს, საქართველოს დამფუძნებელმა კრებამ, საბჭოთა ოკუპაციის საფრთხის ფონზე, ქვეყნის პირველი კონსტიტუცია მიიღო.

გაიგეთ მეტი: