ლელოს თავმჯდომარე მამუკა ხაზარაძე ისევ სატელევიზო დებატებს ითხოვს. ის მოუწოდებს ხელისუფლებას, გახსნან ტელევიზიები და დაელაპარაკონ პირისპირ, რათა რეალობას თვალი გაუსწორონ.

"როგორც ამერიკის ერთ- ერთმა პრეზიდენტმა თქვა, დებატები დემოკრატიის გარანტიააო. ამ დროს საქართველოში მედია ისე, როგორც საზოგადოება ორადაა გახლეჩილი, არც არჩევნებამდე და არც არჩევნების შემდეგ "ოცნება" არ დადის დებატებზე, არ დადის ოპოზიციურ მედიაში. ოპოზიციას კარი აქვს ჩაკეტილი ტელეკომპანია იმედზე და სხვა სახელისუფლო არხებზე.

არ ეწყობა დებატები, არ მიმდინარეობს დიალოგი, რადგან ხელისუფლებას არ აქვს პასუხი მწვავე კითხვებზე, ვერ ხედავს პრობლემების გადაწყვეტის გზებს და არ აქვს ქვეყნის კრიზისიდან გამოყვანის გეგმა", — წერს ხაზარაძე ფეისბუქგვერდზე.

ხაზარაძის თქმით, მხოლოდ კამათსა და აზრთა ჭიდილში იბადება ჭეშმარიტება და ასე შეძლებენ გამოსავლის დანახვას.

"ვინ მიგვიღებს ევროკავშირში თუ ერთმანეთს ტელევიზიაში არ ვესაუბრებით, თუ საკუთარ ნაჭუჭში ვიკეტებით და მხოლოდ მომხრეებთან ვგრძნობთ თავს კომფორტულად?!" — წერს ის.

საქართველოში პოლიტიკური კრიზისი ოპოზიციასა და მმართველ გუნდს შორის ისევ გრძელდება. დაპირისპირებაა ოპოზიციაშიც პარლამენტში შესვლა-არშესვლის საკითხზე. კერძოდ, ერთი პარტია მოქალაქეები პარლამენტში უკვე შევიდა; მეორე, გირჩი კი ამბობს, რომ შევა, თუ 0%-იან საარჩევნო ბარიერზე მიიღებს გარანტიას. დანარჩენი პარტიები ისევ ვადამდელ არჩევნებს ითხოვენ.