პარლამენტში ქართული ოცნების დეპუტატი, ნიკოლოზ სამხარაძე ამბობს, რომ ოპოზიციას თუ სურს მანდატების შეწყვეტა, შეუძლიათ პარლამენტში შევიდნენ და ეს თვითონ გააკეთონ. ამის შესახებ დეპუტატმა რუსთავი 2-ის ეთერში განაცხადა.

როგორც სამხარაძე განმარტავს, ეს არის მანდატები, რომელიც ოპოზიციას ხალხმა მიანიჭა და მმართველი გუნდი არ თვლის საჭიროდ მათი გაუქმების ვალდებულება აიღოს. გარდა ამისა, დეპუტატი აღნიშნავს, რომ ოპოზიციაში მანდატის შეწყვეტის მსურველი 51 დეპუტატია და სწორედ ამდენი ხმა არის საჭირო მათი მოთხოვნის შესასრულებლად.

"ვისაც სურს პარლამენტში შემოსვლა, კარგი ღიაა. ჩვენ თავი შევიკავეთ მათი მანდატების შეწყვეტისაგან, თუ უნდათ, რომ მანდატები შეუწყდეთ, შემოვიდნენ პარლამეტში, მიაჭირონ ხელი მწვანე ღილაკს და შეიწყვიტონ ამით მანდატები, თუ გულწრფელები არიან" — ამბობს სამხარაძე.

60 ოპოზიციონერი დეპუტატიდან ამჟამად 51-მა პარლამენტს უფლებამოსილების შეწყვეტისთვის მიმართა. თუმცა კენჭისყრის დღეს, 2 თებერვალს ქართულ ოცნებაში განაცხადეს, რომ არ შეუწყობენ ხელს "საბოტაჟს", შესაბამისად მანდატების შეწყვეტას მხარს არ დაუჭერენ.