საქართველოს ფინანსთა მინისტრმა დიმიტრი ქუმსიშვილმა თანამდებობის პირის დეკლარაცია 2017 წლის 31 იანვარს შეავსო. დეკლარაციის მიხედვით, მას ჰყავს ცოლი - ნატალია თევდორაშვილი და შვილები ირაკლი და ნინო ქუმსიშვილები.

ქუმსიშვილს, დეკლარაციის შევსების მომენტისთვის, ნაღდი ფულის სახით 48 ათასი ლარი ჰქონდა, მის ანგარიშზე ირიცხებოდა 4 527 ამერიკული დოლარი და 20 234 ლარი, მის ცოლს კი - 9 780 ეევრო. გასულ წელს მინისტრმა იჯარიდან შემოსავალი 8 791 ლარი მიიღო და იპოთეკური სესხის დასაფარად ბანკ ქართუში 18 253 ამერიკული დოლარი გადაიხადა.

რაც შეეხება სხვა შემოსავლებს, დიმიტრი ქუმსიშვილის ცოლის ხელფასი 2016 წელს 2 500 ლარი იყო, მინისტრის შემოსავალი კი - 120 035 ლარი. ამ თანხიდან 68 224 ლარი ეკონომიკისა და მდგრადი განვითარების მინისტრის თანამდებობაზე მიღებული ხელფასია, ათჯერ უფრო ნაკლები - 6 781 ლარი ფინანსთა მინისტრის თანამდებობაზე მიღებული შემოსავალია, დარჩენილი 45 030 საკუთარი კომპანიისგან - შპს რეშენალ სოლუშენსი-სგან მიიღო, რომლის 10 პროცენტსაც ის ფლობს. ამ კომპანიას დიმიტრი ქუმსიშვილთან ერთად შპს კვირის პალიტრა (გაზეთი კვირის პალიტრის გამომცემელი) ფლობს, რომლის დირექტორიც 2012 წლის ოქტომბრამდე, თითქმის ერთი წლის განმავლობაშიც თვითონ იყო. შპს რეშენალ სოლუშენსის სახელზეა რეგისტრირებული ვებგვერდი - hotsale.ge.

კომპანიის 10 პროცენტიანი წილი ქუმსიშვილს 2012 წლის ივნისიდან აქვს. მისი შემოსავალი ამ კომპანიიდან 2013 წელს - 8 700 ლარი იყო, 2014 წელს - 19 475 ლარი, 2015 წელს კი - 39 900 ლარი. დანარჩენი 90 პროცენტიანი წილის მფლობელი შპს კვირის პალიტრა კი, გაზეთ კვირის პალიტრის გარდა საინფორმაციო სააგენტო ინტერპრესნიუსის (15%), რადიო პალიტრას (100%), ტელეკომპანია პალიტრა ნიუსის (100%) წილებს ფლობს.

დეკლარაციის მიხედვით, მინისტრი ფლობს თბილისში 3 ბინას - თამარ მეფის გამზირზე (120 მ2), შარტავას ქუჩაზე (189 მ2) და ჯიქიაზე (91 მ2). გარდა ამისა, საცხოვრებელ სახლს თბილისში ლამისყანის ქუჩაზე (312 მ2) და თეთრი წყაროს რაიონში, მიწის ნაკვეთებს თბილისსა (451 მ2) და თეთრი წყაროს რაიონში (7 955 მ2). მინისტრის სახელზეა რეგისტრირებული მსუბუქი ავტომობილი (მერსედეს ბენცი), რომელიც 2012 წელს 18 ათას ამერიკულ დოლარად იყიდა. ცოლ-ქმარს ქონება ქუმსიშვილის მინისტრად დანიშვნამდე აქვთ ნაყიდი.

მის ცოლს კი ეკუთვნის: 2 ბინა თბილისში, გიორგი ბრწყინვალეს ქუჩასა (604 მ2) და ქავთარაძის (58 მ2) ქუჩაზე. გარდა ამისა, მიწის ნაკვეთებს დაბა წყნეთში (1 207 მ2).