იუსტიციის მინისტრის თქმით, ის არ პირებს ბოდიში მოუხადოს საქართველოს სახალხო დამცველს, უჩა ნანუაშვილს. ამის შესახებ წულუკიანმა ტვ იმედის ეთერში ისაუბრა. მისი თქმით, თუ არსებობდა კითხვები ისინი ქვეყნის შიგნით უნდა მოგვარებულიყო ისე, რომ საქართველო საერთაშორისო ასპარეზზე არ დაზიანებულიყო:

"ბატონ უჩას ქალბატონმა ანა ნაცვლიშვილმა (ახალგაზრდა იურისტთა ასოციაცია) გასცა პასუხი, როდესაც მან დაადასტურა, რომ სამივენი - ხატიაშვილიც (ადვოკატთა ასოციაციის თავმჯდომარე), ომბუდსმენიც და თავად საია მუშაობდნენ ამ სიის საწინააღმდეგოდ სტრასბურგში. ამიტომ აქ საბოდიშოც არაფერია. პირიქით, მას მოუწევს საქართველოს მოსახლეობას მოუხადოს ბოდიში, რომ იმუშავა საქართველოს წინააღმდეგ."

საქმე ეხება ევროსაბჭოს მიერ საქართველოს წარდგენილი მოსამართლეების დამტკიცებას, რომლის პროცესიც ჩაიშალა და რის გამოც საქართველოს ხელისუფლებამ კონკურსი ხელახლა უნდა ჩაატაროს და ევროსაბჭოს ახალი სია წარუდგინოს.

იუსტიციის მინისტრის თქმით, სახალხო დამცველმა სტრასბურგში სხვადსხვა ქვეყნების წარმომადგენელებს მოუწოდა, რომ არ დაეჭირათ მხარი საქართველოს მიერ წარდგენილი კანდიდატებისთვის. უჩა ნანუაშვილმა კი თეა წულუკიანის განცხადებას შეურაცხმყოფელი და გაუგებარი უწოდა.