რუსთავი 2-ის გენერალური დირექტორი, პროკურატურისგან მოითხოვს გამოქვეყნდეს განცხადების შინაარსი, რომლითაც უზენაესი სასამართლოს მოსამართლეებმა, მათზე შესაძლო ზეწოლის გამო, პროკურატურას მიმართეს:

"ჩვენ მოვითხოვთ საქართველოს პროკურატურისგან, რომ გამოქვეყნდეს განცხადების შინაარსი და შეწყდეს ზეწოლა მოსამართლეებზე, არა მხოლოდ ჩვენი საქმის გადაწყვეტის ნაწილში, არამედ იმ ნაწილში, რომ შეცვალონ ამ გადაწყვეტილების შინაარსი. ეს ზეწოლა არის ძალიან ფართომასშტაბიანი, იმიტომ, რომ მიმდინარეობს ანგარიშსწორება არა მხოლოდ ამ მოსამართლეებზე, არამედ მათი ოჯახის წევრებთან, ნათესავებთან და ა.შ."

გვარამია მოუწოდებს საქართველოს პრეზიდენტს, ყველა პრო-დასავლურ მედიასა და არასამთავრობო ორგანიზაციებს დაინტერესდნენ ამ საკითხით.

გვარამიას თქმით, ამ ინფორმაციის გასაჯაროვება იმიტომ არ მოხდა, რომ უზენაესი სასამართლოს თავმჯდომარე ხელისუფლების მოკავშირეა მოსამართლეების წინააღმდეგ. მისივე თქმით, მოსამართლეებზე იყო ზეწოლა, რომ შეეცვალათ ამ განცხადებაში დასახელებული პირების ვინაობა და ხელისუფლების წამომადგენლები ჩაენაცვლებინათ მიხეილ სააკაშვილით და მისი პოლიტიკური თანამოაზრეები:

"უზენაესი სასამართლოს თავმჯდომარე არ არის მოსამართლეების მოკავშირე, იგი არის სახელმწიფოს მოკავშირე მათ წინააღმდეგ. მან პროკურატურაში გადააგზავნა ეს საქმე და მეორე დღიდან ამ მოსამართლეებზე დაიწყო უმძიმესი ზეწოლა, რომ მათ ან გაეტანათ განცხადება, ან შეეცვალათ განცხადებაში მოყვანილი სუბიექტები. დაესახელებინათ არა ხელისუფლება, არამედ ჩვენი მხარე, ან ის ადამიანები, რომლებიც ვითომდა აფილირდებიან ჩვენს მხარესთან, მაგალითად საქართველოს მესამე პრეზიდენტი მიხეილ სააკაშვილი და მისი პოლიტიკური თანამოაზრეები. ეს არის სრულიად გაუგონარი ქმედება, როგორც უზენაესი სასამართლოს თავმჯდომარის ისევე გენერალური პროკურატურის მხრიდან და მე ვფიქრობ, რომ ადამიანებმა, რომლებიც ამ ყველაფერში იღებდნენ მონაწილეობას, დაკარგეს როგორც მორალური, ასევე, პროფესიული უფლება, რომ დაიკავონ უმაღლესი თანამდებობები სახელმწიფო სისტემაში."

გვარამიას განცხადებით, მათ განცხადება მხოლოდ მას შემდეგ გააკეთეს, რაც უვიზო მიმოსვლის პროცესი დასრულდა, რადგან მისი თქმით, ევროპარლამენტი ძალიან სენსიტიურია იმგვარი განცხადებების მიმართ, რომელიც ეხება მედიის და სასამართლოს თავისუფლებას.

გუშინ, 2 თებერვალს, ცნობილი გახდა, რომ 2017 წლის 14 იანვარს, უზენაესი სასამართლოს მოსამართლეების, ბესარიონ ალავიძისა და პაატა ქათამაძის განცხადებისა და სასამართლოს მომართვის საფუძველზე დაიწყო გამოძიება. უზენაესი სასამართლოს ორი მოსამართლე პროკურატურას მათზე შესაძლო ზეწოლის ფაქტების გამოძიებას სთხოვს.