პარტია მოქალაქეების ერთ-ერთი ლიდერის, ლევან იოსელიანის განცხადებით, ევროპულ საქართელოსთან მოლაპარაკებებზე მისვლის პრობლემა არ აქვს, თუნდაც მისი თანაპარტიელი, ალეკო ელისაშვილი არ წაყვეს.

"მე წავალ რა პრობლემაა. ალეკო შეიძლება არ წამოვიდეს, მაგრამ მე წავალ. მაგის პრობლემას საერთოდ ვერ ვხედავ, ყველასთან ვილაპარაკებთ. ოღონდ მთავარი არის სალაპარაკო იყოს ადეკვატური წინადადება და ვფიქრობ, რომ დევს მაგიდაზე, ოპოზიციის შიგნით წინადადება, რომელზეც ღირს მსჯელობა", — განაცხადა მან პალიტრანიუსის ეთერში.

მანამდე მანვე აღნიშნა, რომ ევროპულ საქართველოსთან საუბარი "საერთოდ არ არის პრინციპულად მნიშვნელოვანი" და მათთვის მნიშვნელოვანია, რომ ოპოზიციას ჰქონდეს საერთო აზრი.

"ევროპული საქართველოში არიან კონკრეტული მანდატების მქონე ადამიანები, რომლებთანაც დიდი სიამოვნებთ დავჯდებით და ამ საკითხზე ვილაპარაკებთ", — განაცხადა მან.

კითხვაზე, დაელაპარაკებიან მხოლოდ მანდატიანებს, თუ პარტიის ლიდერებსაც, ის პასუხობს:

"არავისთან არ გვაქვს ლაპარაკის პრობლემა, ვისთანაც უნდათ იმასთან ვილაპარაკებთ. აქ მთავარი ის ხომ არ არის ვის დაველაპარაკებით, მთავარია რაზე ვლაპარაკობთ. გვინდა ვილაპარაკოთ იმაზე, რაც შეიძლება იყოს ამ სიტუაციიდან გამოსავალი" — განაცხადა მან.

დღეს, 14 იანვარს პარტია მოქალაქეებსა და გირჩს შორის ცალკე კონსულტაცია გაიმართა. პარტიების ლიდერებმა, ალეკო ელისაშვილმა და იაგო ხვიჩიამ შეხვედრის დაწყებამდე განაცხადეს, მათი შეთავაზებაა, რომ რიგგარეშე არჩევნები იმ შემთხვევაში მოითხოვონ, თუ თვითმმართველობის არჩევნებში ქართული ოცნება დამარცხდება.

ამასთან დაკავშირებით გიგა ბოკერიამ განაცხადა, რომ პლებისციტის გარდა არსებული პოლიტიკური კრიზისის განმუხტვის მიზნით განხორციელებული სხვა ნაბიჯები მიმართულია იმისთვის, რომ მოახდინოს პოლიტიკური ოპოზიციური კლასის დემორალიზაცია.

საქართველოში 31 ოქტომბერს საპარლამენტო არჩევნები ჩატარდა. პირველი ტური ცხრა პარტიამ გადალახა. მათგან, 8 ოპოზიციურმა ძალამ არჩევნების შედეგები ლეგიტიმურად არ სცნო, მეორე ტურში მონაწილეობა არ მიიღო და მანდატების გაუქმება მოითხოვა. სადეპუტატო უფლებამოსილების შეწყვეტის შესახებ პარლამენტს გირჩისა და მოქალაქეების გარდა ყველა პარტიამ მიმართა. მათ შორის, გირჩი — მეტი თავისუფლების ლიდერმა, ზურაბ ჯაფარიძემაც.

სადეპუტატო უფლებამოსილება ვადამდე შეუწყდა პატრიოტთა ალიანსის 3 წევრს — ირმა ინაშვილს, გიორგი ლომიასა და გოჩა თევდორაძეს. პატრიოტთა ალიანსის სიით მათ ნაცვლად პარლამენტში შევიდნენ დავით ზილფიმიანი, ფრიდონ ინჯია და გელა მიქაძე. პარლამენტში შესვლასთან ერთად მათ პარტია დატოვეს და ახალი პოლიტიკური ძალა — ევროპელი სოციალისტები დააფუძნეს.