ნაციონალური მოძრაობის თავმჯდომარის, ნიკა მელიას განცხადებით, პარტიაში დიდი განახლებისა და დიდი გადალაგების დროა. თუმცა მისი თქმით, ეს არ ნიშნავს იმას, რომ აქამდე ბევრი რამე არასწორად ხდებოდა ან იმას, რომ ვინც წინა ფლანგზე ჩანდა, "დაუმსახურებლად ჩანდა და ამიერიდან აღარ უნდა ჩანდეს". ამის შესახებ მან საკუთარ ფეისბუქზე დაპოსტა.

"ცვლილებების აუცილებლობას ქმნის ის გამოწვევები, რომელიც პარტიის, საერთოდ ქვეყნის წინაშეა — დასამარცხებელია და ხელისუფლებიდან ჩამოსაშორებელია ძალა, რომელიც ქვეყანას დიდ და ღრმა უფსკრულისკენ მიაქანებს. ამ ძალის დასამარცხებლად არ კმარა და აშკარად გასაფართოებელია არსებული ფრონტი. სწორედ ამიტომ აუცილებელია შემოგვიერთდეს ამ ქვეყნის რაც შეიძლება მეტი მოქალაქე, როგორც ენერგიით სავსე ახალგაზრდები, ახალი თაობა, ისე გამოცდილებით სავსე უფროსი თაობა", — აღნიშნა მელიამ.

მისი თქმით, მათ არა ძველი ძალების ახლით ჩანაცვლება, არამედ "ჯამის შეცვლა" უნდათ. როგორც მელიამ აღნიშნა, მათ უნდათ "შესაკრებთა შეკრება და არა შესაკრებთა გადაადგილება".

27 დეკემბერს ნიკა მელია პარტიის თავმჯდომარედ დაამტკიცეს. ენმ-ს პარტიის თავმჯდომარის პოსტი ვაკანტური მას შემდეგ გახდა, რაც ნაციონალური მოძრაობის თავმჯდომარემ, გრიგოლ ვაშაძემ პარტია 15 დეკემბერს დატოვა. ვაშაძემ ნაწილობრივ ისაუბრა წასვლის მიზეზებზეც. მან აღნიშნა რომ, არ ეთანხმება პარტიის ხელმძღვანელობის უმრავლესობის მიერ პარტიის წევრებთან კონსულტაციების გარეშე არჩეულ ტაქტიკას. მისივე თქმით, მისთვის კიდევ უფრო მიუღებელია პარტიული სტრატეგიის არარსებობა. ეს კი მხოლოდ ქართულ ოცნებას აძლევს ხელს.