2021 წლიდან ავსტრალიაში შეცვლილ სახელმწიფო ჰიმნს შეასრულებენ. პრემიერმინისტ სკოტ მორისონის გადაწყვეტილებით, ჰიმნში ავსტრალია "ახალგაზრდა და თავისუფლად" აღარ იქნება მოხსენიებული, რათა მან ქვეყნის აბორიგენულ წარსულს ხაზი გაუსვას. მორისონის თქმით, იგი იმედოვნებს, რომ ეს ცვლილება "ერთიანობის სულისკვეთებას" შექმნის.

გადაწყვეტილება მოულოდნელი აღმოჩნდა მთავრობისათვის, თუმცა მათ, ისევე როგორც ოპოზიციურმა პარტიებმა, ცვლილება მოიწონეს.

უფრო კონკრეტულად, ჰიმნის ტექსტში სტრიქონი "ჩვენ ახალგაზრდა ვართ და თავისუფალნი" შეიცვლება, როგორც "ჩვენ ერთნი ვართ და თავისუფალნი".

სახელმწიფო ჰიმნის ტექსტში ცვლილება ჯერ კიდევ 2020 წლის დასაწყისში მოითხოვა ახალი სამხრეთ უელსის ლიდერმა, გლედის ბერეჯიკლიენმა. მისი აზრით, იმჟამინდელი ტექსტი უგულბელყოფდა ავსტრალიის "ამაყი პირველი მოსახლეების კულტურას".

ავსტრალიაში ადგილობრივი, იგივე აბორიგენი მოსახლეობა, მე-18 საუკუნეში ბრიტანული კოლოზინაციის დაწყებამდე ათიათასობით წლით ადრე სახლობდა.

"ეს ცვლილება არაფერს შლის; ჩემი რწმენით, იგი მხოლოდ მატებს [ჰიმნს]", — აღნიშნავს პრემიერმინისტრი მორისონი, რომელიც კონსერვატორია, — "იგი იმ გრძელ გზაზე მიუთითითებს, რომელიც ჩვენ, როგორც ერმა, გამოვიარეთ. იგი ასევე მიუთითებს, რომ ჩვენი ეროვნული ისტორია 300-ზე მეტი ხალხის მოდგმის და ენობრივი ჯგუფისგან შედგება, რაც დედამიწაზე ყველაზე წარმატებულ მულტიკულტურულ ერად გვაქცევს".

მორისონი ასევე დასძენს, რომ ცვლილება კორონავირუსის პანდემიის პერიოდში ავსტრალიის ერთიანობასაც უსვამს ხაზს.

ბოლო წლების განმავლობაში ავსტრალიაში არაერთი კულტურული თუ პოლიტიკური ძვრა მოხდა აბორიგენული წარსულის დასაფასებლად. გასული წლის დეკემბერში რაგბის ეროვნულმა ნაკრებმა სახელმწიფო ჰიმნი პირველად შეასრულა აბორიგენულ — სიდნეის მახლობლად მცხოვრები იუნას ხალხის — ენაზე.