ნაციონალური მოძრაობის ერთ-ერთი ლიდერი, ხატია დეკანოიძე მოქალაქეების ლიდერს, ალეკო ელისაშვილს მოუწოდებს დახუროს ბიძინა ივანიშვილთან ვაჭრობის ყოველგვარი სქემა. ასე ეხმაურება დეკანოიძე ელისაშვილის დადებით შეფასებას ოპოზიციურ სპექტრში გავრცელებული იდეაზე, რომლის მიხედვითაც, რიგგარეშე არჩევნები შესაძლოა ჩატარდეს იმ შემთხვევაში, თუ ქართული ოცნება მომავალი თვითმმართველობის საპარლამენტო არჩევნებში მიღებულ შედეგზე, ანუ 48%-ზე ნაკლებს აიღებს.

"ეს არის ვაჭრობა ბიძინა ივანიშვილთან და ყოველგვარი ვაჭრობის სქემა ბიძინა ივანიშვილთან ჩვენ უნდა დავხუროთ და მოვუწოდებ ალექსანდრე ელისაშვილს, რომ ასეთი ვაჭრობის სქემები დახუროს, ვინაიდან ეს ახდენს დისკრედიტაციას ზოგადად იმ იდეის, რასაც ქვია არჩევნების გაყალბების [წინააღმდეგ] და თავისუფლებისთვის ბრძოლა", — განაცხადა დეკანოიძემ.

გუშინ, 29 დეკემბერს, რუსთავი 2-ის ეთერში ალეკო ელისაშვილმა განაცხადა, რომ არ იცის ვის ეკუთვნის ეს იდეა — ელჩებს, თუ რომელიმე ოპოზიციონერს, მაგრამ, მიესალმება მას.

"მაინტერესებს ამის საწინააღმდეგო ვის რა ექნება, იმიტომ, რომ ეს არის რეალურად კრიზისის განმუხტვის ძალიან მაგარი და რეალური საშუალება", — განაცხადა ელისაშვილმა.

ოპოზიციური პარტიები, რომლებმაც ცესკოს მონაცემებით ბარიერი გადალახეს ბოიკოტის რეჟიმში არიან და პარლამენტში შესვლაზე უარს ამბობენ, ამიტომ პარლამენტი ერთპარტიულია და მხოლოდ ქართული ოცნების დეპუტატებითაა დაკომპლექტებული. პარტიების უმეტესობამ მანდატებზე უარი თქვა და საპარლამენტო სიებიც ჩახსნა. ნაწილი კი ფასილიტატორების ჩართულობით მმართველ გუნდთან მოლაპარაკებებს ელოდებიან და მხოლოდ ამის შემდეგ აპირებენ მანდატებზე უარის თქმას ან პარლამენტში შესვლას. მათ შორისაა ელისაშვილის პარტია მოქალაქეებიც.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.