პარტია მოქალაქეების ლიდერმა, ალეკო ელისაშვილმა განაცხადა, რომ ოთხივე საკითხზე, რაზეც ოპოზიცია ხელისუფლებასთან მოლაპარაკებებს აწარმოებს, ქართულ ოცნებას უკან ახევინებენ.

"თვენახევარი ვიჩხუბეთ, ვიბრძოლეთ და ამ ბრძოლის შედეგი უკვე იქ დევს. ოთხივე საკითხზე უკან ვახევინებთ ქართულ ოცნებას. ეს უკან დახევა არის სახელმწიფოსთვის ძალიან დიდი წინსვლა. ყველაზე მნიშვნელოვანი, რაც იქ დევს, პოლიტპატიმრების გარდა, არის საარჩევნო სისტემის ძირეული ცვლილება, თუ ამაზე შევთანხმდებით, შევალ პარლამენტში", — განაცხადა ელისაშვილმა.

მოქალაქეების ლიდერებმა, ალეკო ელისაშვილმა და ლევან იოსელიანმა არ მოაწერეს ხელი საერთო ოპოზიციურ შეთანხმებას მანდატების უკვე ოფიციალურად გაუქმების შესახებ, რომელიც, სიმბოლურად მე-10 მოწვევის პარლამენტის პირველი სხდომის პარალელურად მოსწავლე ახალგაზრდობის სასახლის ბაღში გაიმართა. პარტიას არც ცესკოსთვის მიუმართავს პროპორციული საარჩევნო სიის ანულირების მოთხოვნით. მოქალაქეების ლიდერები აცხადებდნენ, რომ სანამ მოლაპარაკებები გრძელდება, მანდატებზე უარის თქმას არ აპირებენ.

ოფიციალურად პარლამენტმა მუშაობა 11 დეკემბერს დაიწყო. პარალელურად კი, ბარიერგადალახულმა ოპოზიციურმა პარტიებმა საკუთარ მანდატებზე უარი თქვეს. ქართული ოცნება ამბობს, რომ ყველა ასეთ პარტიას მანდატები გაუუქმდება, ხოლო დაფინანსება შეუწყდება. მმართველი ძალის განცხადებითვე, ისინი დააინიცირებენ კანონპროეტქს, რომლის თანახმადაც საარჩევნო რეგისტრაცია გაუუქმდება პარტიას, რომლის ლიდერიც კონსტიტუციურ საარჩევნო ცენზს არ აკმაყოფილებს, კერძოდ, არის უცხო ქვეყნის მოქალაქე ან მისჯილი აქვს თავისუფლების აღკვეთა.

თუ გინდა გაიგო, როგორ მუშაობს ან ვერ მუშაობს მე-10 მოწვევის პარლამენტი, რა ინიციატივები აქვთ დეპუტატებს და ზოგადად, როგორ მიიღება გადაწყვეტილებები, რომლებიც ჩვენს ყოველდღიურობას განსაზღვრავს, შემოგვიერთდი ჯგუფში — რა ხდება პარლამენტში.