61 წლის ნებრასკელმა ქალმა საკუთარი შვილიშვილი გააჩინა მას შემდეგ, რაც ის თავისი შვილისა და მისი ქმრის სუროგატი გახდა.

სესილ ელეჯმა საკუთარი შვილის, მეთიუ ელეჯის, და მისი ქმრის, ელიოტ დოგერტის, გოგონა 9 თვე მუცლით ატარა და წინა კვირაში გააჩინა.

სესილმა თქვა, რომ წყვილს ეს მაშინ შესთავაზა, როცა მათ პირველად თქვეს, რომ ოჯახის შექმნა სურდათ.

"რა თქმა უნდა, ყველას გაეცინა", — უთხრა სესილმა BBC-ს.

სესილის თქმით, რომელიც მაშინ 59 წლის იყო, მისი შემოთავაზება თავდაპირველად ოჯახში ხუმრობასავით დარჩა და არა — რეალურ გამოსავლად.

"ეს, უბრალოდ, ძალიან ლამაზ სენტიმეტს ჰგავდა მისი მხრიდან. ის ძალიან უანგარო ქალია", — თქვა ელიოტმა.

მაგრამ როდესაც მეთიუმ და ელიოტმა, რომელიც ომაჰაში სესილთან და მის ქმართან ახლოს ცხოვრობენ, ბავშვის ყოლის ვარიანტების განხილვა დაიწყეს, ექიმმა მათ უთხრა, რომ ეს ვარიანტი ნამდვილად განსახილველი იყო.

სესილს გაესაუბრნენ და ტესტირებები გაუკეთეს, რომელთაგან თითოეულმაც სუროგაციის შესაძლებლობა დაადასტურა.

"საკუთარ ჯანმრთელობაზე ძალიან ვზრუნავ. არავითარი მიზეზი არ არსებობდა იმაში ეჭვის შესატანად, რომ ბავშვის მუცლით ტარება შემიძლია", — თქვა მან.

სპერმის დონორი სესილის შვილი, მეთიუ, გახდა, კვერცხუჯრედის კი — ელიოტის და ლეა.

ელიოტმა, რომელიც პარიკმახერად მუშაობს, თქვა, რომ, მართალია, ჰეტეროსექსუალური წყვილებისთვის ხელოვნური განაყოფიერება უკანასკნელი გზაა, მაგრამ მათთვის ეს ბიოლოგიური შვილის ყოლის "ერთადერთი იმედი" იყო.

"ყოველთვის ვიცოდით, რომ უნიკალურები უნდა ვყოფილიყავით და არასტანდარტულად გვეფიქრა", — დაამატა მეთიუმ, რომელიც საჯარო სკოლის მასწავლებელია.

სესილის თქმით, ფეხმძიმობამ მშვიდად ჩაიარა. თავის სამ შვილზე წინა ორსულობებთან შედარებით ჩვეული სიმპტომები, უბრალოდ, "ცოტათი გაძლიერდა".

მეტიც, მისი ასაკის ყველაზე აშკარა ინდიკატორმა ემბრიონის იმპლანტაციიდან ერთი კვირის შემდეგ იჩინა თავი, როდესაც მეთიუმ და ელიოტმა სახლში ორსულობის ტესტი მოიტანეს, რათა გაეგოთ, რამდენად წარმატებით მიდიოდა პროცესი.

"გვითხრეს, რომ ეს არ გვექნა, მაგრამ ბიჭები ვერ ითმენდნენ", — სიცილით თქვა სესილმა.

სესილმა ტესტს შეხედა და იმედგაცრუებულმა თქვა, რომ პასუხი უარყოფითი იყო, მაგრამ როდესაც მეთიუ მის დასამშვიდებლად მივიდა, მან ისეთი რამ შეამჩნია, რაც სესილს არ დაუნახავს: მეორე ვარდისფერი ხაზი ტესტზე, რაც ორსულობას ადასტურებდა.

"ძალიან ბედნიერი მომენტი იყო", — თქვა მეთიუმ და დედამისის ცუდ მხედველობაზე იხუმრა.

"არაფრის დანახვა არ შეუძლია, მაგრამ ბავშვის გაჩენას მოახერხებს", — იხსენებს სესილი მეთიუსა და ელიოტის სიტყვებს.

სესილის თქმით, ორსულობაზე გამოხმაურება დიდწილად დადებითი იყო, რასაც მცირეოდენი "შოკის ფაქტორი" მოყვა, განსაკუთრებით მისი სხვა ორი შვილის, მეთიუს დედმამიშვილების, მხრიდან.

"როცა ყველამ დაინახა დიდი სურათი, მერე მათი მხრიდან მხოლოდ მხარდაჭერას ვგრძნობდი", — თქვა მან.

მიუხედავად ამისა, ფეხმძიმობამ ნებრასკაში ლგბტ ოჯახების მიმართ დისკრიმინაციის რამდენიმე მნიშვნელოვანი მარკერი გამოკვეთა. მართალია, აშშ-ის ამ შტატში ერთისა და იმავე სქესის მქონე წყვილების ქორწინება 2015 წელს უზენაესი სასამართლოს გადაწყვეტილებით კანონიერი გახდა, ნებრასკაში არ არის კანონები, რომლებიც სექსუალური ორიენტაციის ნიშნით დისკრიმინაციას კრძალავს. 2017 წლამდე შტატში ათწლეულების წინანდელი აკრძალვა არსებობდა ჰომოსექსუალური წყვილებისთვის შვილის აყვანაზე.

სესილმა თქვა, რომ ის წარუმატებლად ებრძოდა თავის სადაზღვევო კომპანიას, რომელიც მის ჯანმრთელობის ხარჯებს დაფარავდა, ბავშვი რომ მისი ყოფილიყო. გარდა ამისა, იმ კანონის მიხედვით, რომელიც ბავშვის გამჩენს დედად ასახელებს, პატარა უმა ლუიზას დაბადების მოწმობაში სესილი და მეთიუ არიან შეყვანილები, ელიოტი კი — არა.

"ეს, უბრალოდ, ერთი პატარა, მიკრომაგალითია იმ რაღაცების, რაც წინაღობებს გვიქმნის", — თქვა მეთიუმ.

მეთიუ მედიაში პირველად ოთხი წლის წინ გამოჩნდა, როდესაც ის სკოლიდან გაათავისუფლეს მას შემდეგ, რაც სკოლის ადმინისტრაციას განუცხადა, რომ ის და ელიოტი დაქორწინებას აპირებდნენ.

მეთიუს მიმართ ასეთმა მოპყრობამ მის ახლობლებში პროტესტი გამოიწვია და მშობლებმა და ყოფილმა და იმჟამინდელმა მოსწავლეებმა ონლაინ-პეტიცია შექმნეს, რომელიც "ბატონი ელეჯისა და მომავალი პერსონალის მიმართ სამსახურეობრივი დისკრიმინაციის შეწყვეტას" მოითხოვდა.

პეტიციამ, რომელიც ახლა დასრულებულია, 102 995 მხარდამჭერი მოაგროვა.

სესილის თქმით, მათი ოჯახი, როგორც წესი, პირად საკითხებზე საჯაროდ არასდროს საუბრობს, თუმცა მათ გადაწყვიტეს, ეს ამბავი ხალხისთვის გაეზიარებინათ, რათა დაუპირისპირდნენ ლგბტ ინდივიდებისა და ოჯახების მიმართ "მტრულ" დამოკიდებულებას და აჩვენონ, რომ "იმედი ყოველთვის არსებობს".

"ნელ-ნელა ვსწავლობ, რომ ეს საკუთარ თავზე არ უნდა მივიღო", — ამბობს მეთიუ მის და მისი ოჯახის მიმართ არსებულ უარყოფით გამოხმაურებებზე. "დღის ბოლოს ჩვენ გვყავს ოჯახი, ჩვენ გვყავს მეგობრები და ჩვენ გვყავს უზარმაზარი თემი, რომელიც მხარს გვიჭერს".

პატარა უმას დაბადებიდან ერთი კვირის შემდეგ სესილმა თქვა, რომ ის და მისი შვილიშვილი თავს კარგად გრძნობდნენ.

"ეს პატარა გოგონა იმდენი სითბოთია გარშემოტყმული, ის ძალიან მზრუნველ ოჯახში გაიზრდება. ეს ასე უნდა მომხდარიყო", — თქვა სესილმა.