კვირას ბელარუსში მიმდინარე აქციებზე, პოლიციამ რამდენიმე ათეული დემონსტრანტი დააკავა. ამის შესახებ ინფორმაციას Reuters ავრცელებს.

მედიის ცნობით, საპროტესტო მსვლელობის დროს მონაწილეთა დასაშლელად პოლიციამ რეზინის ტყვიები და ცრემლსადენი გაზიც გამოიყენა. სხვადასხვა მედიის ინფორმაციით, დემონსტრანტები ქუჩებს მიუხედავად პოლიციის წინააღმდეგბისა, არ ტოვებენ.

ამასთან, Liveuamap-ის მიერ ტვიტერზე გავრცელებულ ვიდეოებში ჩანს, რომ მომიტინგეები და სამართალდაცავები ერთმანეთს რამდენჯერმე დაუპირისპირდნენ.

ბელარუსში საპროტესტო აქციები 9 აგვისტოს ჩატარებული საპრეზიდენტო არჩევნების შედეგების გამოცხადებისთანავე დაიწყო. მოსახლეობა მას არ აღიარებს. დემონსტრანტები პრეზიდენტ ალექსანდრ ლუკაშენკოს გადადგომასა და ხელახალი არჩევნების ჩატარებას მოითხოვენ. ადგილობრივი საარჩევნო კომისიის მიერ გამოქვეყნებულ არჩევნების შედეგებს გაერთიანებული ოპოზიციის კანდიდატი, სვეტლანა ტიხანოვსკაიაც არ ეთანხმება, რომელიც შედეგების გამოცხადების შემდეგ იძულებული გახდა, ქვეყანა დაეტოვებინა. მისი ინიციატივით, ძალაუფლების მშვიდობიანი გადაბარებისთვის საკოორდინაციო საბჭო შეიქმნა.

ევროპარლამენტმა ბელარუსში აგვისტოში ჩატარებულ არჩევნებს გაყალბებული უწოდა და არ აღიარა. ევროპარლამენტის თქმით, ლუკაშენკოს 5 ნოემბრიდან, როცა მისი უფლებამოსილების ვადა ამოიწურება, პრეზიდენტად აღარ აღიარებენ.