აქციაზე დაკავებული აქტივისტების ადვოკატი, ედუარდ მარიკაშვილი აცხადებს, რომ ეს დაკავება უსაფუძვლო იყო და პოლიციამ ამით გარკვეული "შიშებისგან დაიზღვია თავი". მისი თქმით, დაკავებულები დროებითი მოთავსების იზოლატორში არიან გადაყვანილნი, ხოლო ხვალ სასამართლო სხდომები გაიმართება.

"პოლიციის მიერ ასეთი პრევენციული დაკავებები თავიდანვე უსაფუძვლო და უკანონო იყო, რადგან მათ არანაირი სამართალდარღვევა არ ჩაუდენიათ. ვფიქრობ, რომ პოლიციამ გარკევუწლილად, რაღაც შიშებისგან დაიზღვია თავი მათი გამორიდებით იმ ადგილიდან, სადაც აქცია იმართებოდა. ამ ეტაპზე, ოქმები შედგა კანონმდებლობის მიხედვით, ახლა გადაიყვანენ იზოლატორში და ხვალ გაიმართება სასამართლოები. ჩვენ შევეცდებით, რომ სასამართლოში დავამტკიცოთ მათი უდანაშაულობა", — განაცხადა მარიკაშვილმა.

პარლამენტთან მიმდინარე აქციაზე მოძრაობა სირცხვილიას რამდენიმე აქტივისტი, ლექსო მაჭავარიანი, გიორგი მჟავანაძე და ნოდარ რუხაძე დააკავეს. აქციის მონაწილეების თქმით, დაკავებები მას შემდეგ დაიწყო, რაც აქციაზე გათბობის მიზნით შეშის შეტანა სცადეს.

დღეს მოძრაობა სირცხვილია პარლამენტთან აქციას მართავს. მათი აქცია 22:00 საათიდან 05:00 საათამდეა დაგეგმილი. ეს აქცია გადაადგილების შეზღუდვის ამოქმედებასთან ერთად მიმდინარეობს. აქტივისტების განცხადებით, დღეს ისინი ამ შეზღუდვებს "დაუმორჩილებლობას" უცხადებენ.

საკოორდინაციო საბჭოს გადაწყვეტილებით, 9 ნოემბრიდან დიდ ქალაქებში: თბილისში, ბათუმში, ქუთაისში, რუსთავში, ზუგდიდში, გორსა და ფოთში 22 საათიდან დილის 5 საათამდე გადაადგილება შეიზღუდა. შეზღუდვა ვრცელდება როგორც ქვეითად, ისე ტრანსპორტით და კერძო ავტომობილებით მოსიარულეებზე.