საქართველოში გამოკითხული მოსახლეობის ყველაზე დიდი წილი - 36 პროცენტი მიიჩნევს, რომ საქართველო საერთოდ არ ვითარდება. შედარებით ნაკლები - 32 პროცენტი მიიჩნევს, რომ სწორი მიმართულებით ვითარდება, 27 პროცენტი კი ფიქრობს, რომ არასწორი მიმართულებით ვითარდება. დარჩენილი 5 პროცენტი - „არ ვიცის“ პასუხობს. ასეთია NDI-ს მიერ ჩატარებული გამოკითხვის შედეგები.

თუ 2009 წლიდან დღემდე NDI-ს მიერ ჩატარებულ კვლევაში იდენტურ კითხვაზე გაცემულ პასუხებს შევადარებთ, ყველაზე ნაკლები მოქალაქე 2016 წელს, ყველაზე მეტი კი - 2012 წელს ფიქრობდა, რომ საქართველო სწორი მიმართულებით ვითარდება. პასუხს „საქართველო არასწორი მიმართულებით ვითარდება“ ყველაზე იშვიათად 2013 წელს, ხშირად კი 2016 წელს დასახელდა. მოქალაქეების ყველაზე დიდი წილი 2014 წელს ასახელებდა, რომ „საქართველო საერთოდ არ იცვლება“, ყველაზე ნაკლები 2012 წელს.

იმავე კითხვაზე პასუხი გამოკითხულთა შეხედულებებთან ყველაზე ახლოს მდგომი პარტიების მიხედვით ასეთია: ქართული ოცნების შემთხვევაში ყველაზე მეტი მაჩვენებელი 56 პროცენტი მიიჩნევს, რომ ქვეყანა სწორი მიმართულებით ვითარდება (არ იცვლება - 26%; არასწორად - 14%), ნაციონალური მოძრაობის შემთხვევაში 50 პროცენტი მიიჩნევს, რომ არასწორად ვითარდება, ყოველი მეათე გამოკითხული (10%) კი ფიქრობს, რომ სწორი მიმართულებით ვითარდება.

დღეს, 16 იანვარს, ეროვნულ-დემოკრატიული ინსტიტუტი (NDI) და CRRC–საქართველო მედიას 2016 წლის ნოემბერ-დეკემბერში ჩატარებული საზოგადოებრივი აზრის კვლევის შედეგების პირველ ნაწილს წარადგენს. პრეზენტაციაზე წარმოდგენილი არის ქვეყნის განვითარების კურსთან, საგარეო პოლიტიკასთან, ადგილობრივ თვითმმართველობასთან და ქალების პოლიტიკურ ჩართულობასთან დაკავშირებული მიგნებები.

კვლევის საველე სამუშაოები ჩატარდა 4 ნოემბერი - 4 დეკემბრის პერიოდში, საქართველოს მასშტაბით (ოკუპირებული ტერიტორიების გამოკლებით), 3,141 პირისპირ ინტერვიუს წარმომადგელობითი შერჩევის საფუძველზე. კვლევის ცდომილება 1,8 პროცენტია.

NDI-ის კვლევებს აფინანსებს შვედეთის საერთაშორისო განვითარების და თანამშრომლობის სააგენტო (Sida) და ატარებს CRRC–საქართველო.