ამერიკის შეერთებული შტატების პრეზიდენტი, დონალდ ტრამპი სომხურ და აზერბაიჯანულ მხარეებს ცეცხლის შეწყვეტის შეთანხმების მიღწევას ულოცავს. ამის შესახებ იგი სოციალურ ქსელ twitter-ზე წერს.

"ვულოცავ სომხეთის პრემიერმინისტრ ნიკოლ პაშინიანსა და აზერბაიჯანის პრეზიდენტ ილჰამ ალიევს, რომლებიც ეს ესაა დათანხმდნენ ცეცხლის შეწყვეტის ძალაში შესვლას. ბევრი სიცოცხლე გადარჩება. ვამაყობ ჩემი გუნდით: სახელმწიფო მდივან მაიკ პომპეოთი, სტივ ბიგენითა და ეროვნული უსაფრთხოების საბჭოთი, რომ ამ შეთანხმებას მიაღწიეს", — წერს პრეზიდენტი.

ფოტო: US Embassy Tbilisi, Georgia

აზერბაიჯანსა და სომხეთს შორის ცეცხლის შეწყვეტა ძალაში დღეს, 26 სექტემბერს დილის 8 საათზე შევიდა. ამერიკის შეერთებული შტატების სახელმწიფო დეპარტამენტის ცნობით, აშშ-მ ინტენსიურ მოლაპარაკებებს საგარეო საქმეთა მინისტრებსა და მინსკის ჯგუფის თავმჯდომარეებს შორის სომხეთისა და აზერბაიჯანის დაახლოების მიზნით ხელი შეუწყო.

"სომხეთის საგარეო საქმეთა მინისტრი, ზოჰრაბ მნაცაკანიანი და აზერბაიჯანის საგარეო საქმეთა მინისტრი, ჯეიჰუნ ბაირამოვი 24 ოქტომბერს სახელმწიფო მდივნის მოადგილეს, სტეფან ბეიგანს შეხვდნენ და დაადასტურეს ქვეყნების მზადყოფნა შეასრულონ და დაიცვან ოქტომბერს მოსკოვში მიღებული შეთანხმება ჰუმანიტარული ცეცხლის შეწყვეტის შესახებ", — აცხადებენ დეპარტამენტში.

მთიან ყარაბაღში სამხედრო დაპირისპირება 27 სექტემბერს განახლდა. სომხეთი და აზერბაიჯანი პროვოცირებაში ისევ ერთმანეთს ადანაშაულებენ, თვითაღიარებული ყარაბაღი კი მომხდარზე პასუხისმგებლობას აზერბაიჯანის პრეზიდენტს ილჰამ ალიევს აკისრებს.

რუსეთის შუამავლობით, სომხეთი და აზერბაიჯანი ჰუმანიტარული მიზნით ცეცხლის შეწყვეტაზე ორჯერ შეთანხმდნენ, თუმცა ზავი ორივეჯერ მალევე დაირღვა. ბაქომ და ერევანმა ცეცხლის შეწყვეტაში ისევ ერთმანეთი დაადანაშაულეს.

DW.com-ის ინფორმაციით, ყარაბაღის კონფლიქტისას სომხეთის მხრიდან 974 სამხედრო და 37 მშვიდობიანი მოქალაქე დაიღუპა. აზერბაიჯანის მხრიდან დაღუპული სამხედროების ზუსტი რიცხვი უცნობია, თუმცა ბაქო აცხადებს, რომ მათი მხრიდან 56 მშვიდობიანი მოქალაქე დაიღუპა, 300-ზე მეტი კი დაშავდა.