საქართველოს შინაგან საქმეთა სამინისტროს განცხადებით, მთავარი არხის ინფორმაცია, რომლის მიხედვითაც შსს-სა და სუს-ის თანამაშრომლები წინასაარჩევნოდ პარტიული დავალებებით რეგიონებში იმყოფებიან, არ შეესაბამება სიმართლეს.

"ერთ-ერთ მედიასაშუალებაში გასული ინფორმაცია იმის შესახებ, რომ შინაგან საქმეთა სამინისტროს თანამშრომლები თითქოს პარტიული მითითებით წინასაარჩევნოდ საქართველოს რეგიონებში იმყოფებიან არის "ფეიკ ნიუსი" და არ შეესაბამება სიმართლეს.

შინაგან საქმეთა სამინისტრო არის პოლიტიკურად ნეიტრალური უწყება და მედიასაშუალების მხრიდან მსგავსი ცრუ ინფორმაციის გავრცელება ემსახურება პოლიციის მიზანმიმართულ დისკრედიტაციას" — აცხადებენ უწყებაში.

გუშინ, 23 ოქტომბერს, მთავარმა არხმა გაავრცელა ინფორმაცია იმის შესახებ, რომ შსს-სა და სუს-ის თანამშრომლები, ქართული ოცნების დავალებითა და წინასაარჩევნო მობილიზების მიზნით, რეგიონებში იმყოფებიან. ტელეკომპანიამ ეთერში გაუშვა სატელეფონო ზარი, სადაც, მათი თქმით, ჟურნალისტისა და შსს-ს ცენტრალური კრიმინალური პოლიციის დეპარტამენტის წარმომადგენლის საუბარია ასახული. შსს-ს თანამშრომელს მთავარი არხის ჟურნალისტი ქართული ოცნების წარმომადგენლად ეცნობა და ეკითხება, თუ ჩავიდა უკვე რეგიონში, რაზეც ის პასუხობს: "აქეთ ვარ, ნორმალური სიტუაციაა, მთალად ძალიან სახარბიელო არა, თუმცა კონტროლს ექვემდებარება და მაქსიმალურად ვიყენებთ რესურსს".