ევროპული საქართველოს ზუგდიდის მაჟორიტარი დეპუთათობის კანდიდატი, გიგი უგულავა, ზუგდიდში მომხდარ შეიარაღებულ თავდასხმაზე შინაგან საქმეთა მინისტრის, ვახტანგ გომელაურის განცხადებას ეხმაურება.

უგულავას თქმით, მინისტრის განცხადება იმის შესახებ, რომ ამ სპეცოპერაციას ხელმძღვანელობდნენ ჰუმანური მეთოდებით, არის თვალში ნაცრის შეყრა. უგულავა ფიქრობს, რომ სპეცოპერაცია ჩაფლავდა, რადგან კრიმინალი არც იდენტიფიცირებულია და არც დაჭერილი. მან აღნიშნა, რომ ამით მწვანე შუქი აენთება მსგავს დანაშაულებრივ ქმედებებს.

"სრული უპასუხისმგებლობაა შინაგან საქმეთა მინისტრის განცხადება და მორიგი თვალში ნაცრის შეყრა, რომ სპეცოპერაციის დროს, თურმე, ხელმძღვანელობდნენ ჰუმანური მეთოდებით. უნდა ესმოდეს, განსაკუთრებით შინაგან საქმეთა მინისტრს, რომ როდესაც დამნაშავე დაჭერილი არ არის და მაღალი ალბათობით ის იდენტიფიცირებულიც კი არ არის, ეს ნიშნავს, რომ ამით მწვანე შუქი ენთება მსგავს ქმედებებს.

ჯერ კიდევ გასული საუკუნის 80-იან წლებში, ანტიტერორისტული ბრძოლის ორგანოები და სახელმწიფოები შეთანხმდნენ, რომ როდესაც ტერორისტი მიაღწევს თავის საწადელს, ეს ნიშნავს წახალისებას და მწვანე შუქის ანთებას მსგავსი ქმედებებისათვის.

დღეს, როდესაც ჩვენ ვხედავთ ფაქტს, რომ იდენტიფიცირებულიც კი არ არის დამნაშავე, იმიტომ, რომ ან ხდება დაკავება ცხელ კვალზე, ან რამდენიმე დღის შემდეგ უნდა არსებობდეს ფოტორობოტი, უნდა იყოს იდენტიფიცირებული პირი და საზოგადოება ერთვება ასეთ ძიებაში და თუ ვინმეს ინფორმაცია აქვს, აწვდის მას სამართალდამცველებს. ფაქტია, რომ არც ერთი მომხდარა და არც მეორე.

ამიტომ, ჩვენ, სამწუხაროდ, გადაუჭარბებლად შეგვიძლია ვთქვათ, რომ ამ მომენტისთვის ეს არის ჩაფლავებული ოპერაცია და უნდა ავღნიშნოთ, რომ კრიმინალთან ბრძოლაში ქართული ოცნების მთავრობა დამარცხდა. ზუგდიდის ინციდენტი იყო ამის სამწუხარო გამოვლინება", — განაცხადა უგულავამ.