არასამთავრობო ორგანიზაციები თავისუფალ დემოკრატებს ე.წ. კაბელების საქმეზე გამოტანილ განაჩენზე სამსჯელოდ პარტიის ოფისში ხვდებიან. EMC-ს წარმომადგენელმა, სოფო ვერძეულმა შეხვედრის დაწყებამდე განაცხადა, რომ დღევანდელ შეხვედრაზე დაცვის მხარისგან მოისმენენ იმ დაკავებულთა ადვოკატების სამართლებრივ არგუმენტებსა და იმ სტრატეგიას, რომლითაც აპირებენ ისინი ამ საქმის გაგრძელებას სააპელაციო სასამართლოში:

"ცხადია, საქმე განსაკუთრებული ინტერესისაა და საზოგადოება, დამკვირვებლები, დიდი ხანია აკვირდებოდნენ საქმის მიმდინარეობას. არაერთი კითხვა გაჩნდა ამ საქმის მიმდინარეობასთან დაკავშირებით, დაწყებული პირველი ეტაპიდან, როდესაც გრიფი დაედო და დაცვის მხარის ადვოკატებს არსებითად გაურთულდათ თავისი ფუნქციების შესრულება. შემდგომში იყო ბევრი კითხვა ბრალდების მხარის მტკიცებულებებთან დაკავშირებით. არის ბევრი კითხვა, რომელსაც დღეს მოვისმენთ და ასევე იმ გეგმებს, რომლითაც საქმის გაგრძელებას აპირებენ".

საქართველოს ახალგაზრდა იურისტთა ასოციაციის ხელმძღვანელი ანა ნაცვლიშვილი კი

საქმის განხილვა მიმდინარეობდა 18 თვის განმავლობაში, დაიკითხა, ათეულობოთ ადამიანი, არსებობს არაერთი მტკიცებულება თუ დოკუმენტი და მოსამართლეს დასჭირდა მხოლოდ 2 დღე იმისთვის, რომ განაჩენი გამოეტანა

ანა ნაცვლიშვილი

მიიჩნევს, რომ საქმეში ბევრი გარემოება დარჩა, რომელიც ამყარებს ეჭვებს, საქმეში არსებული პოლიტიკური მოტივაციის შესახებ:

"ძალიან მნიშვნელოვანია, რომ საქმის განხილვა მიმდინარეობდა 18 თვის განმავლობაში, დაიკითხა, ათეულობოთ ადამიანი, არსებობს არაერთი მტკიცებულება თუ დოკუმენტი და მოსამართლეს დასჭირდა მხოლოდ 2 დღე იმისთვის, რომ განაჩენი გამოეტანა".

ანა ნაცვლიშვილი კაბელების საქმეზე მოსამართლის გადაწყვეტილებას უსამართლოს, უკანონოსა და დაუსაბუთებელს უწოდებს. მისი თქმით, საქმეში არ არის მტკიცებულებათა ერთობლიობა, რომელიც უტყუარად ადასტურებს გასამართლებული პირების მიერ უკანონო ქმედების ჩადენას:

"შესაბამისად, ჩვენ ვფიქრობთ, რომ ბრალდებამ ვერ დაასაბუთა, რომ ეს ადამიანები არიან დამნაშავეები, ამიტომ სასამართლოს სხვაგვარი გადაწყვეტილება უნდა მიეღო. ჩვენ აუცილებლად გავასაჩივრებთ ამ გადაწყვეტილებას ზემდგომ ინსტანციაში და თუ საჭირო გახდა, საერთაშორისო სასამართლოში".

ე.წ. კაბელების საქმეზე ბრალდებული თავდაცვის სამინისტროს თანამშრომლები ნუგზარ კაიშაური, დავით წიფურია, არჩილ ალავიძე, გიორგი ლობჟანიძე და გიზო ღლონტი თბილისის საქალაქო სასამართლოს მოსამართლე ბესიკ ბუგიანიშვილმა დამნაშავედ სცნო და მათ 7-წლიანი პატიმრობა მიუსაჯა. პროკურატურა დაკავებულებს სახელმწიფოს კუთვნილი 4 მილიონის გაფლანგვას ედავება, რასაც ბრალდებულები არ ეთანხმებიან და საქმეს პოლიტიკურად მოტივირებულს უწოდებენ.