ივერი მელაშვილის ადვოკატის, გიორგი მშვენიერაძის განცხადებით, 1:200 000 მასშტაბის რუკა, რომლის არგამოყენებასაც საქართველო-აზერბაიჯანის საზღვრის დემარკაცია-დელიმიტაციის საქმეზე დაკავებულებს ედავებიან, 2014 წელს სამთავრობო დონეზე განიხილეს. მშვენიერაძემ ფორმულას პოლიტმეტრში სტუმრობისას აღნიშნა, რომ 2014 წელს შეხვედრა მაშინდელ პრემიერმინისტრ ირაკლი ღარიბაშვილთანაც გაიმართა. მისივე თქმით, შეხვედრას სხვა მაღალი თანამდებობის პირებიც ესწრებოდნენ.

"ისევ იქნა წარდგენილი ეს არგუმენტები, რატომ არის გამოუსადეგარი 1:200 000 მასშტაბის რუკები და რატომ არ გამოგვადგება არგუმენტად. განხილვის შემდეგ დაისვა საკითხი, რომ ამ რუკების ყველა ვერსია უნდა გვქონდეს. ეს დაავალა მინდია ჯანელიძეს ღარიბაშვილმა, მან დაავალა საკუთარ თანამშრომელს, სვანაძეს, რომელმაც ერთ თვეში დაურეკა თავდაცვის სამინისტროს ამჟამინდელ წარმომადგენელს ბატონ ხორბალაძეს და უთხრა, რომ რუკა მოიპოვა, ერთი ეგზემპლარი. როცა ჰკითხეს, საიდან მოიპოვა, თქვა, რომ საზღვრის დაცვის დეპარტამენტში, შსს-ში მისცეს ეს რუკა", — განაცხადა გიორგი მშვენიერაძემ.

განახლება:

ინტერვიუში გიორგი მშვენიერაძემ თანამდებობის პირებს შორის თავდაცვის ყოფილი მინისტრი, ირაკლი ალასანიაც ახსენა. მოგვიანებით ფეისბუქზე მან განმარტა, რომ ირაკლი ალასანიასთან შეხვედრა ზაზა ონიანმა და ნოდარ ხორბალაძემ ცალკე, 2013 წელს გამართეს [ალასანიამ ზაზა ონიანს ნოდარ ხორბალაძე გააცნო], ხოლო ღარიბაშვილთან, სადაც მინდია ჯანელიძეც იყო — 2014 წელს, რომელ შეხვედრასაც ერთ თვეში მინდია ჯანელიძის თანამშრომლის — გიორგი სვანაძის — მხრიდან ნოდარ ხორბალაძისთვის რუკის გადაცემა მოჰყვა.

მან, ასევე, აღნიშნა, რომ სამთავრობო კომისიაზე საკითხი 2015 წელს განიხილეს, ხოლო 2018 წელს ამ საკითხის განხილვა მიხეილ ჯანელიძის მონაწილეობით მოხდა, სადაც ხორბალაძეს მოუსმინეს, გაეცნენ 32-36 წლების 1:200 000 მასშტაბის რუკების შედარებას 1:500 000 რუკებთან და შეხვედრაზე გადაწყდა, რომ მინისტრი ამ საკითხს პრემიერმინისტრთან არ წარადგენდა.

ის, აგრეთვე, საუბრობს, იმაზე რომ კარტოგრაფიული მასალა, რომლის დამალვასაც პროკურატურა ნატალია ილიჩოვას ედავება, დაკავებულს 2019 წლის მაისიდან აღარ ჰქონია. უფლებადამცველის თქმით, ილიჩოვამ კომისიის წევრის თანამდებობა სწორედ წლინახევრის წინ დატოვა.

"ჩვენებით დადასტურებულია, რომ ეს მასალები ირმა გაბუნიას ილიჩოვამ გადასცა, რადგან გაბუნია კომისიის ახალი წევრი გახდა. როდესაც ილიჩოვა დაკითხეს, მან თქვა, რომ მასალები იქნება ირმა გაბუნიას ოთახში, მას ექნება, მას აქვს, და როცა ჩხრეკაზე მივიდნენ, ეს ამოიღეს", განმარტავს მშვენიერაძე.

საქართველო-აზერბაიჯანის საზღვრის საქმე

29 სექტემბერს საქართველოს გენერალურმა პროკურატურამ განაცხადა, რომ 17 აგვისტოს თავდაცვის სამინისტროსგან მიიღეს ინფორმაცია, რომელიც ეხებოდა საქართველო-აზერბაიჯანის საზღვრის დელიმიტაცია-დემარკაციის კომისიის საქმიანობას. მათივე განცხადებით, დაიწყო გამოძიება, რომელიც უცხო ქვეყნისათვის საქართველოს ტერიტორიის ნაწილის გაცემისკენ მიმართული მოქმედებას ეხებოდა. როგორც უწყებაში ამბობენ, საქართველოს საზიანოდ მეზობელი ქვეყნისთვის 3 500-მდე ჰა ფართობი მიწის გადაცემის საფრთხე შეიქმნა.

2 ოქტომბერს, პირველმა არხმა გაავრცელა ინფორმაცია, რომ ორიგინალი რუკებისა, რომლის საფუძველზეც პროკურატურამ აზერბაიჯანთან საზღვრის დადგენის საქმეზე გამოძიება დაიწყო, ქართულ მხარეს ბიზნესმენმა, დავით ხიდაშელმა გადასცა. ვრცელდება ინფორმაცია იმაზეც, რომ რუკების დედნები მან რუსეთში საგარეო დაზვერვის დახმარებით მოიპოვა.

გაიგეთ მეტი რუკებზე:

საგამოძიებო ორგანოებმა ამ საქმეზე საზღვრის დამდგენი კომისიის წევრების, ივერი მელაშვილისა და ნატალია ილიჩოვას სახლები და სამუშაო ოფისები გაჩხრიკეს. ორივე მათგანი გამოძიების დაწყებას პოლიტიკას და არჩევნებს უკავშირდება.

7 ოქტომბერს კომისიის წევრები დააკავეს. 9 ოქტომბერს კი ილიჩოვასა და მელაშვილის აღკვეთის ღონისძიების სახით სასამართლომ პატიმრობა შეუფარდა.

ოპოზიცია მიმდინარე გამოძიებას წინასაარჩევნო პროცესს უკავშირებს. ნაწილი აცხადებს იმასაც, რომ ყარაბაღში მიმდინარე კონფლიქტის ფონზე მსგავსი გამოძიება პარტნიორ ქვეყანასთან ურთიერთობის დაძაბვის მცდელობაა. არასამთავრობო ორგანიზაციები ამბობენ, რომ საზღვარზე გამოძიება აჩენს ეჭვს პოლიტიკურ მოტივაციებზე.

მმართველ გუნდში ამას უარყოფენ და ამტკიცებენ, რომ მეზობელ ქვეყანასთან ურთიერთობას ვერაფერი დააზიანებს.

გაიგეთ მეტი: