სამეგრელოში სტრატეგია აღმაშენებლის გენერალური მდივნის, პაატა მანჯგალაძის განცხადებით, გუშინ, 9 ოქტომბერს ქართული ოცნებისა და სტრატეგია აღმაშენებლის მხარდამჭერებს შორის ჩხოროწყუში დაპირისპირება მოხდა. მანჯგალაძის თქმით, ქართული ოცნების აქტივისტებმა, რომლებიც ალკოჰოლური თრობის ზემოქმედების ქვეშ იყვნენ, მათ საარჩევნო აგიტაციაში ხელი შეუშალეს. მანჯგალაძე აღნიშნავს, რომ მსგავსი ქმედებები პირველი არ არის და სისტემატურად მიმდინარეობს.

"სამწუხაროდ, ქართული ოცნება კვლავ აგრძელებს ზემოქმედებას, დაპირისპირებასა და ხელის შეშლას საარჩევნო კამპანიაში ჩვენს მხარდამჭერებზე. წინასაარჩევნო კამპანიის ჩატარების ხელშეშლას, ასევე, ადგილი ჰქონდა ზესტაფონსა და თელავში აგიტატორებზე ზემოქმედების სახით. მე მინდა ქართულ ოცნებას ვუთხრა, რომ ეს არის მათი უსუსური მცდელობა, რომელიც ამჟღავნებს მათ სისუსტეს", — აცხადებს მანჯგალაძე.

პარტიაში On.ge-ს უთხრეს, რომ ჩხოროწყუში მომხდარ დაპირისპირებაზე პოლიციისთვის არ მიუმართავთ, თუმცა აღნიშნავენ, რომ აქვთ ვიდეო კადრები, სადაც ქართული ოცნების აქტივისტების მხრიდან მათთვის ხელის შეშლა ჩანს.

ქართული ოცნების პრესსამსახურში გვითხრეს, რომ საკითხს მოიკითხავენ. მათ პასუხს მიღებისთანავე შემოგთავაზებთ.